2:61  [CO  2.61]  vulgo  cernitur  tanta  inscitia  et  stupiditas.  Vulgus  nomino  praecipuos  etiam  quosque,  donec  in  ecclesiae  corpus  insiti  fuerint.  Adde  quod  Iesaias  (53,  1)  non  extraneis  modo,  sed  Iudaeis  etiam  qui  domestici  censeri  volebant,  propheticam  doctrinam  incredibilem  fore  admonens,  simul  causam  addit,  quia  non  revelabitur  omnibus  brachium  Dei.  Quoties  ergo  nos  conturbat  credentium  paucitas,  ex  opposito  veniat  in  mentem,  non  alios  comprehendere  Dei  mysteria  nisi  quibus  datum  est.  CAPUT  VIII.  Probationes,  quatenus  fert  humana  ratio,  satis  firmas  suppetere  ad  stabiliendam  scripturae  fidem.  [Inst  1.8.1.]  Haec  nisi  certitudo  adsit  quolibet  humano  iudicio  et  superior  et  validior,  frustra  scripturae  autoritas  vel  argumentis  munietur,  vel  ecclesiae  consensu  stabilietur,  vel  aliis  praesidiis  confirmabitur;  siquidem,  nisi  hoc  iacto  fundamento  suspensa  semper  manet.  Sicuti  contra,  ubi  semel  communi  sorte  exemptam  religiose  ac  pro  dignitate  amplexi  sumus,  quae  ad  eius  certitudinem  animis  nostris  inserendam  et  infigendam  non  adeo  valebant,  tunc  aptissima  sunt  adminicula.  Mirum  enim  quantum  confirmationis  ex  eo  accedat,  dum  intentiore  studio  reputamus,  quam  ordinata  et  disposita  illic  appareat  divinae  sapientiae  dispensatio,  quam  coelestis  ubique  et  nihil  terrenum  redolens  doctrina,  quam  pulchra  partium  omnium  inter  se  consensio,  et  eiusmodi  reliqua  quae  ad  conciliandam  scriptis  maiestatem  conveniunt.  Tum  vero  solidius  adhuc  confirmantur  corda  nostra,  dum  cogitamus,  rerum  magis  dignitate  quam  verborum  gratia  in  eius  admirationem  nos  rapi.  Nam  et  hoc  non  sine  eximia  Dei  providentia  factum  est,  ut  sublimia  regni  coelestis  mysteria  sub  contemptibili  verborum  humilitate  bona  ex  parte  traderentur;  ne  si  splendidiore  eloquentia  illustrata  forent,  cavillarentur  impii,  solam  eius  vim  hic  regnare.  Nunc  quum  inculta  illa  et  tantum  non  rudis  simplicitas  maiorem  sui  reverentiam  excitet  quam  ulla  rhetorum  facundia,  quid  iudicare  licet  nisi  potentiorem  scripturae  sacrae  vim  veritatis  constare,  quam  ut  verborum  arte  indigeat?  Non  ergo  absque  ratione  apostolus  (1  Cor.  2,  4)  Dei  virtute,  non  humana  sapientia,  fundatam  esse  fidem  Corinthiorum  arguit,  quod  sua  inter  eos  praedicatio,  non  persuasoriis  humanae  sapientiae  verbis,  sed  ostensione  spiritus  et  potentiae  commendabilis  fuisset.