7:608  nem  sapimus,  ita  Deum  metimur  nostro  ingenio.  Unde  fit,  ut  semper  magis  arrideant  externae  pompae,  quae  nihili  sunt  coram  Deo,  quam  interior  cordis  veritas,  quam  solam  probat  ac  requirit.  Rursus,  nota  est  ingenii  nostri  lascivia,  quae  hic  maxime  exsultat,  ubi  nihil  prorsus  audendum  erat.  Quoslibet  cultus,  et  alios  subinde  atque  alios  comminisci,  homines  sibi  permittunt.  Neque  hoc  est  saeculi  unius  vitium.  Usque  ab  exordio  mundi,  ita  licenter  mundus  cum  Deo  lusit.  Ipse  autem  clamat,  nihil  sibi  pluris  esse,  quam  obedientiam  (1  Sam.  15,  22).  Itaque  omnes  cultus,  praeter  mandatum  suum  confictos,  non  modo  tanquam  irritos  respuit,  sed  plane  damnat.  Quid  testimoniis  utar  in  re  tam  aperta,  quum  proverbiales  inter  Christianos  esse  debeant  eiusmodi  sententiae?  Quod  prius  membrum,  quasi  supervacuum  secure  omittunt  fucosi  mediatores,  ut  ne  verbulo  quidem  attingant,  spiritualem  esse  Dei  cultum:  quid  aliud,  [pag.  101]  quam  latebras  quaeritant  ad  fallendum?  Fingamus  tamen  id  esse  tolerabile.  Quod  autem  in  operibus  per  se  bonis  numerant,  quae  sponte  suscipiuntur  absque  Dei  mandato,  in  eo  totam  pie  recteque  vivendi  regulam  pervertunt.  Ubi  enim  erit  illud:  Frustra  me  colunt,  docentes  praecepta  hominum  (Matth.  15,  9):  si  vagari  suo  arbitrio,  extra  Dei  legem,  hominibus  liceat?  Ac  eo  impudentiae  erumpunt,  ut  dicant  a  spiritu  sancto  discrepare,  qui  non  probant  supererogationis  opera.  Cur  istud?  An  quoniam  eiusmodi  opera  apud  Iesaiam  commendat  spiritus,  quum  hoc  solo  titulo  damnat  quaecunque  pulcherrimam  alioqui  speciem  habent,  quod  ea  Deus  non  requirat  e  manibus  nostris  (Ies.  1,  12)?  Video  quid  obiiciant:  ut  omnia  vendamus,  ut  perpetuam  colamus  virginitatem,  ut  gratuitam  praedicationis  operam  impendamus  ecclesiae,  non  praecipi  quidem  a  Domino,  placere  nihilominus.  Atqui  respondeo,  etiam  si  quis  haec  omnia  simul,  et  longe  maiora  praestet,  nihil  ultra  praestare,  quam  quod  lex  continet.  Illic  enim  iubemur  Deum  ex  toto  corde  diligere.  Quis  hominum  hanc  metam  sua  perfectione  superet?  Si  excipiant,  nullum  tamen  de  operibus  ipsis  speciale  exstare  mandatum,  ad  hoc  quoque  facilis  est  responsio.  Neque  enim  haec  omnibus  convenirent.  Neque  rite  suscipiuntur  in  eum  finem,  quasi  per  se  valeant,  aut  quasi  ita  coli  Deus  velit.  Si  quis,  nulla  necessitate  inductus,  vendat  quaecunque  habet,  abiecta  familiae  suae  cura,  quasi  venditio  per  se  sit  virtus,  nonne  stultitiae  merito  damnabitur?  Neque  enim  omnes  promiscue  alloquitur  Christus,  quum  dicit:  Vade,  et  vende  omnia:  sed  eum  qui  se  falso  tota  lege  perfunctum  putans  [pag.  102]  inani  fiducia  turgebat  (Matth.  19,  21).  Ut  eum  ostendat  Christus  procul  adhuc  a  tota  perfectione  abesse,  vitium,  in  quo  sibi  blandiebatur,  attingit:  quod  scilicet  opibus  suis  ni-