5:606  a  l'usage  que  la  parolle  de  Dieu,  les  Canons  et  les  loix  ordonnent:  a  scavoir  aux  gages  des  vrays  ministres,  aux  escolles  et  aux  paovres:  incontinent  ces  pillars  et  devorateurs  des  biens  ecclesiastiques  cryent,  qu'on  faict  un  grand  sacrilege,  que  le  patrimoine  de  Christ  est  mis  en  proye,  l'Eglise  est  despoillee.  Et  n'y  a  auiourdhuy  entre  les  Estatz  de  l'Empire  debat  plus  urgent,  ne  plus  perilleux,  que  de  la,  et  de  iour  en  iour  s'egrit  d'avantage.  Pourtant  non  seulement  a  cause  de  la  Religion,  mais  aussi  pour  conserver  la  paix  et  tranquillite  publicque,  il  sera  necessaire  de  remedier  a  ce  mal.  Et  pourroit  on  faire  quelque  commencement  des  maintenant,  si  de  ces  gros  revenuz  des  chappitres  et  moyneries,  on  en  assignoit  autant  que  la  necessite  le  requiert  aux  vrays  Ministres,  et  pour  entretenir  les  escolles:  de  la  moderation,  on  en  pourroit  facilement  convenir.  Puis  apres,  quand  ceux  que  tout  le  monde  congnoist,  ne  povoir  de  rien  profiter  a  l'Eglise,  et  estre  seulement  en  charge,  tant  pour  leur  bestise  [fol.  115]  et  nonchalance,  que  pour  leur  vie  dissolue,  decederoyent  de  ce  monde,  on  pourroit  transfere!*  leurs  biens  a  ceulx  qui  serviroyent  a  l'Eglise,  ou  voudroyent  profiter  pour  y  servir:  de  laquelle  chose  nous  avons  grand'  necessite.  On  pourroit  aussi  deputer  portion  raisonnable  pour  les  paovres.  Voila  quant  aux  biens  ecclesiastiques,  la  distribution  et  usage  d'iceulx.  De  la  discipline  du  peuple.  A  ce  que  la  discipline  du  peuple,  laquelle  aussi  est  griefvement  decheute,  soit  remise  en  son  entier,  il  sera  necessaire  pour  le  premier,  que  oultre  les  sermons  ordinaires,  qui  se  devront  faire  toutes  les  festes  pour  instruire  le  peuple  fidelement  en  la  doctrine  chrestienne,  les  petis  enfans  soyent  instruictz  a  part  en  tous  les  articles  de  nostre  foy:  comme  du  peche  originel  et  actuel,  de  la  iustification,  des  vrays  offices  de  la  vie  chrestienne,  de  la  vertu  et  utilite  de  la  parolle  de  Dieu,  de  l'efficace  et  usage  des  Sacremens,  de  l'obeissance  des  fideles:  qu'on  leur  explique  le  Symbole  des  Apostres,  l'Oraison  dominicale,  les  dix  commandemens,  qu'on  leur  enseigne  les  principalles  matieres  de  l'Evangile.  Il  iauldra  donques  en  telle  sorte  instruire  diligemment  la  ieunesse,  et  interroguer  ceulx  qui  ont  ouy  pour  scavoir  combien  chascun  aura  profite  :  et  remonstrer  a  ceulx  qui  n'auront  point  este  assez  attentifz.  Apres  que  les  enfans  auront  ainsi  este  deuement  enseignez,  et  auront  si  bien  profite  qu'on  les  pourra  admettre  a  la  table  du  Seigneur,  il  sera  de  besoing  que  premierement  devant  toute  l'Eglise,  ilz  facent  profession  de  leur  foy,  et  eulxmesmes  promettent  et  s'obligent  d'obeir  a  IESUS  Christ  et  son