35:606  phement  a  plene  gorge,  les  autres  ne  demandent  qu'a  se  tenir  a  ce  qu'ils  ont  conceu  en  leur  cerveau.  Apres  on  en  verra  beaucoup  de  stupides,  qui  ne  sont  esmeus  nullement,  et  ne  peuvent  estre  touchez  non  plus  que  des  pierres:  les  autres  encores  qu'ils  ayent  quelque  belle  couverture  de  piete,  sont  menteurs  et  pariures,  il  n'y  a  que  fallace  en  eux  et  hypocrisie.  Nous  voyons  cela:  et  quand  le  Prophete  ne  l'auroit  pas  dit,  ouvrons  les  yeux  et  nous  le  trouverons  estre  accompli.  Et  n'est-ce  pas  une  chose  espouvantable,  et  un  monstre  contre  nature?  Il  est  bien  certain.  Or  yci  nous  pourrions  estre  fort  scandalisez,  et  mesmes  ce  nous  seroit  comme  une  barre  pour  nous  empescher  de  venir  a  l'Evangile,  quand  nous  regarderions  a  ce  que  fait  le  monde,  et  dirions,  Et  comment?  la  parolle  de  Dieu  doit  estre  le  souverain  bien  et  la  felicite  des  hommes,  comment  est-ce  qu'elle  est  ainsi  reiettee?  Et  puis  comment  Dieu  souffre  il  qu'on  se  mocque  ainsi  de  luy  et  qu'on  luy  resiste,  et  qu'il  ne  se  face  point  ouir,  qu'il  ne  se  face  point  donner  le  credit  qui  luy  appartient?  Voyla  comme  nous  sommes  tentez  de  ne  point  croire  a  l'Evangile.  Voire:  comme  si  l'infidelite  des  hommes  deroguoit  a  la  verite  de  Dieu,  et  qu'elle  amoindrist  l'honneur  qui  luy  appartient.  Ainsi  non  sans  cause  le  Prophete  Isaie  a  entrelace  ceste  sentence.  Car  s'il  eust  simplement  dit  ce  que  nous  avons  veu  par  ci  devant,  c'est  que  tout  le  monde  devoit  estre  arrouse  de  nostre  Seigneur  Iesus  Christ,  et  que  la  doctrine  de  l'Evangile  devoit  avoir  son  estendue  par  tout,  et  que  les  Rois  se  devoyent  assuiettir  a  luy  :  maintenant  nous  dirions,  Ho,  ce  n'est  pas  pour  nostre  temps  que  le  Prophete  Isaie  a  parle:  car  nous  voyons  tout  l'opposite,  au  lieu  que  la  terre  seroit  arrousee  pour  obtenir  salut,  nous  voyons  qu'il  y  a  un  deluge  de  toute  iniquite:  nous  voyons  que  les  hommes  sont  comme  abbrutis  avec  une  rebellion  infernale  pour  reietter  tout  ce  qui  est  de  Dieu.  On  voit  brief  que  l'Evangile  est  si  mal  receu  que  c'est  une  horreur.  Puis  qu'ainsi  est,  ce  que  le  Prophete  a  dit  ne  doit  pas  estre  encore  verifie.  Or  cela  (comme  i'ay  dit)  seroit  pour  renverser  nostre  foy,  mais  quand  il  conioint  ceste  sentence  avec  ce  que  nous  avons  veu  ci  dessus:  c'est  que  cependant  que  Dieu  envoye  la  pluye  pour  vivifier  les  hommes,  il  ne  fait  pas  ceste  grace  speciale  de  son  sainct  Esprit  a  tous  de  recevoir  ce  qu'il  dit:  mais  qu'il  y  en  aura  la  plus  part  d'incredules,  qui  auront  les  aureilles  bouschees,  ou  bien  s'endurciront,  et  seront  tant  plus  envenimez  a  mal  :  que  les  autres  ne  tiendront  conte  du  bien  inestimable  qui  leur  est  communique.  Quand  donc  le  Prophete  a  declare  toutes  ces  choses,  et  que  nous  le  voyons,  il  ne  faut  plus  que  nous  en  soyons  estonnez:  mais  que  plustost  nostre  foy  en  soit  confermee.