25:606  soyons  du  tout  siens?  Et  d'autant  qu'il  nous  a  tendu  la  main  pour  nous  racheter,  ne  faut-il  pas  que  nous  soyons  son  heritage,  quand  il  nous  a  acquis  par  sa  vertu?  Le  peuple  donc  s'il  eust  eu  un  grain  de  prudence,  devoit  bien  se  ranger  en  toute  humilite  pour  recevoir  la  doctrine  qui  luy  estoit  preschee  par  Moyse.  Et  mesme  quelle  authorite  meritoit  la  Loy,  qui  estoit  ainsi  approuvee  par  tant  de  miracles  ?  Car  Dieu  ne  commande  pas  simplement  a  Moyse  de  parler,  apres  l'avoir  choisi  pour  son  prophete:  mais  il  le  tire  en  la  montagne,  il  le  separe  de  la  compagnie  des  hommes,  afin  que  quand  il  viendra  mettre  en  avant  la  Loy,  qu'on  le  tienne  comme  un  Ange,  et  non  point  comme  une  creature  mortelle.  Il  a  este  la  quarante  iours  sans  boire  ne  sans  manger:  pour  monstrer  qu'il  a  este  exempte  du  rang  commun  des  hommes,  et  que  Dieu  l'avoit  recueilli  comme  en  sa  gloire  celeste.  Moyse  vient-il?  il  y  a  en  sa  face  une  clarte  si  grande,  qu'il  semble  que  ce  soit  un  soleil.  Au  lieu  qu'on  luy  attribue  des  cornes,  il  est  dit,  qu'il  y  avoit  des  rayons  de  soleil  tout  a  l'entour,  c'est  a  dire,  une  telle  spendeur  qu'il  falloit  qu'il  meist  un  voile  devant  sa  face.  Et  a  quoy  servoit  cela,  sinon  pour  ratifier  et  approuver  la  Loy  que  Dieu  luy  avoit  donnee,  et  qui  luy  estoit  commise:  et  qu'on  cogneust  que  ce  n'est  pas  une  doctrine  forgee  d'un  homme  caduque?  Et  au  reste,  voila  les  tonnerres  et  esclairs,  les  trompettes  qui  sonnent:  qu'il  semble  que  tout  le  monde  doive  estre  comme  abysme,  il  n'y  a  lieu  ne  haut  ne  bas  qui  n'en  soit  esmeu,  et  qui  ne  tremble  quand  il  est  question  que  Dieu  prononce  sa  voix.  Quand  donc  la  Loy  est  si  bien  seellee,  et  avec  une  telle  maieste,  ne  faut-il  pas  que  le  peuple  soit  plus  que  stupide,  de  n'escouter  point  son  Dieu  parlant  avec  une  telle  force?  Or  tant  y  a  que  la  Loy  est  mesprisee:  et  mesmes  cependant  que  Dieu  prepare  son  serviteur  Moyse  pour  la  publier,  voila  le  peuple  qui  n'a  point  patience  que  la  volonte  de  Dieu  luy  soit  apportee:  mais  il