5:604  De  biens  ecclesiastiques.  La  eharite  et  communication  fraternelle  qui  estoit  du  commencement  de  l'Eglise  entre  les  chrestiens,  les  incitoit  a  eslargir  et  consacrer  de  leurs  biens  a  Dieu,  tant  en  leurs  assemblees,  que  ailleurs:  a  ce,  que  ceux  qui  administroyent  [fol.  112]  les  biens  spirituelz,  c'est  a  dire  la  doctrine  de  vie  et  les  sainctz  Sacrementz,  eussent  leur  vivre  temporel,  pour  n'estre  point  distraictz  de  leur  ministere:  affin  aussi  que  les  freres  indigens  fussent  secourus  tellement,  que  nul  n'eust  necessite  en  la  compagnie  chrestienne.  Apres  les  Princes  fideles  ont  assigne  revenus  du  publique,  tant  pour  les  gaiges  des  Ministres,  et  de  ceux  qu'on  instruict,  pour  venir  au  ministere,  que  pour  la  nourriture  des  paovres.  Pareillement  les  aultres  ont  puis  donne  champs,  possessions,  heritaiges,  et  aultres  rentes.  Lesquelles  choses  par  succession  de  temps  ont  este  augmentees  sans  fin  et  sans  mesure,  pour  diverses  considerations.  Toutesfoys  les  Canons  ordonnent,  que  l'usage  et  la  distribution  de  tous  ces  biens  soit  telle.  A  scavoir  qu'on  en  face  quatre  portions.  Que  l'une  soit  laissee  a  l'Evesque,  a  ce  qu'il  puisse  soustenir  les  charges  de  son  office,  faire  bien  aux  paovres  estrangiers,  et  aultres,  et  entretenir  a  l'escolle  quelques  clers  pour  servir  a  l'Eglise.  Que  la  seconde  soit  pour  le  reste  du  clerge,  a  ce  que  chascun  se  puisse  entretenir  en  son  ministere,  ou  bien  a  l'escolle,  pour  se  preparer.  Que  la  tierce  soit  reservee  pour  entretenir  les  Temples  et  bastimentz,  et  fournir  a  telz  fraiz.  Que  la  quatriesme  soit  distribuee  aux  paovres.  Depuis  on  a  dresse  diverses  maisons  pour  la  necessite  des  Eglises,  tant  en  general,  que  des  hommes  particuliers,  avec  les  revenuz  dependans:  comme  sont  les  escolles,  les  hospitaulx,  pour  les  orfelins  et  paovres  enfans,  pour  vieilles  gens,  pour  malades,  pour  aultres  indigens  et  estrangiers:  lesquelz  tous  ont  leurs  noms  aux  decretz  et  constitutions  imperiales.  Ces  revenuz  pour  la  plus  grand  part,  ont  este  commis  au  clerge,  pour  les  conserver  et  dispenser;  pource  qu'on  estimoit  cest  estat  la  estre  de  plus  grande  fidelite  et  de  meilleure  affection  envers  les  paovres.  Ceux  qui  ont  eu  premierement  ceste  charge,  on  les  a  appellez  Diacres  et  soubz  Diacres.  Depuis  avec  le  temps,  on  a  institue  ceux  qu'on  nomme  oeconomes  et  defenseurs.  [fol.  113]  Or  long  temps  a  que  cest  ordre,  lequel  devoit  estre  inviolable,  entant  que  ces  biens  estoyent  dediez  a  Dieu,  a  este  abatu,  en  telle  sorte  que  non  seulement  les  portions,  qu'on  avoit  attribue  au  clerge  qui  servoit  a  l'Eglise,  ou  a  ceux  qui  se  preparoyent  pour  y  servir,  Item,  aux  estrangers,  et  aultres  paovres,  ne  leur  sont  donnees,  mais