48:604  impatience  nous  cognoissons  alors  l'assistance  de  Dieu.  Voyla  donc  comme  Dieu  ne  nous  delivre  pas  incontinent:  mais  toutesfois  il  ne  nous  laisse  gueres  languir:  car  le  plus  long  temps  que  nous  puissions  dire,  c'est  nostre  vie.  Dieu  nous  promet  assistance  contre  les  assaux,  et  delivrance.  Cependant  nous  avons  a  batailier  contre  les  tentations  de  nostre  chair  tant  que  nous  sommes  en  ce  monde.  Il  est  vray:  mais  si  nous  regardons  a,  la  petitesse  de  nostre  vie  trouverons-nous  le  terme  long?  Nenni:  car  mille  ans  mesmes  n'est  qu'un  iour  devant  Dieu,  Si  donc  nous  regardons  a  cela,  alors  il  ne  nous  coustera  gueres  d'endurer  toute  nostre  vie.  Voyla  pourquoy  il  dit  que  ce  sera  bien  tost  apres.  Ainsi  apprenons  de  faire  nostre  proufit  de  ce  passage:  non  point  pour  cognoistre  seulement  qu��  Iesus  Christ  a  parle  a  ses  Apostres,  mais  pour  cognoistre  que  ceste  parolle  s'addresse  a  nous.  Vray  est  que  nous  ne  recevons  pas  le  S.  Esprit  en  forme  de  feu:  mais  tant  y  a  que  cest  office  n'a  pas  este  donne  en  vain  a  Iesus  Christ,  et  que  nous  en  avons  la  vertu:  et  qu'aussi  il  n'a  point  retire  le  Baptesme  avec  luy:  mais  que  tout  ainsi  qu'il  nous  a  laisse  le  signe,  c'est  quant  et  quant  une  approbation  qu'il  sera  tousiours  present  pour  nous  faire  valoir  ce  sacrement  par  son  sainct  Esprit.  Mais  aussi  il  faut  que  nous  cognoissions  que  nous  sommes  pleins  de  toutes  pollutions,  afin  d'aller  a  Iesus  Christ  qu'il  nous  en  nettoye.  Vray  est  que  nous  n'aurons  pas  cest  advis  de  nous,  mais  il  faut  que  Dieu,  par  les  admonitions  qu'il  nous  en  fait,  nous  attire  a  Iesus  Christ  pour  chercher  la  verite  du  Baptesme.  Mais  sur  tout  ne  soyons  pas  si  fols  de  penser  que  les  creatures  nous  puissent  subvenir,  mais  allons  droit  a  Iesus  Christ,  recognoissans  qu'il  est  nostre  tout.  Vray  est  que,  quand  il  est  dit  qu'il  baptize,  si  nous  regardons  qu'il  est  loin  de  nous  et  esleve  en  ceste  maieste  souveraine  par  dessus  toutes  creatures,  il  semblera  que  nous  avons  quelque  occasion  de  desfiance:  mais  d'autant  qu'il  est  nostre  frere,  nous  avons  acces  a  luy  pour  nous  y  addresser.  Confions-nous  donc  qu'il  tiendra  sa  promesse,  et  que  tout  ce  qu'il  a  dit  de  sa  bouche  sera  certain  et  indubitable,  et  au  reste  que  le  temps  ne  sera  long.  Et  pourtant,  quand  nous  aurons  endure  un  iour,  que  nous  soyons  prests  a  endurer  un  mois,  et  que  nous  regardions  a  ce  Royaume  qui  n'ha  nul  changement:  et  alors  il  est  certain  que  nous  n'irons  pas  seulement  un  pas,  mais  que  nous  continuerons  de  marcher,  iusques  a  ce  que  nous  serons  parvenus  au  but  qui  nous  est  propose.  Suyvant  ceste  saincte  doctrine  nous-nous  prosternerons  etc.