35:604  nous  profiteroit-il  ?  Encores  qu'il  fust  Sauveur  et  Redempteur,  cela  nous  seroit  inutile,  nous  n'y  aurions  ni  part  ni  portion.  Mais  d'autant  qu'il  a  este  predit  si  long  temps  devant  qu'il  fust  envoye,  qu'il  arrouseroit  tous  peuples:  voire,  pource  que  ceux  qui  auparavant  n'avoyent  point  entendu,  entendront  :  et  ceux  ausquels  il  n'avoit  point  este  raconte,  l'orront:  cognoissons  que  nostre  Seigneur  nous  a  adoptez,  quand  Iesus  Christ  est  venu  au  monde,  et  qu'il  a  accompli  ce  qui  estoit  requis  et  necessaire  a  nostre  salut:  tellement  que  la  doctrine  de  l'Evangile  est  maintenant  comme  une  pluye  pour  nous  donner  vigueur  celeste,  en  lieu  que  nous  sommes  du  tout  steriles:  et  pour  ce  que  nous  sommes  affamez  et  vuides  de  la  grace  de  Dieu,  qu'il  faut  que  nous  recevions  substance  par  la  doctrine  de  l'Evangile,  et  que  nous  sentions  ce  que  vaut  et  de  quoy  nous  profite  la  mort  qu'a  souffert  nostre  Redempteur,  et  que  sa  vie  est  la  perfection  de  nostre  ioye.  Or  il  est  certain  que  le  Prophete  n'a  point  voulu  yci  parler  des  Iuifs,  qui  des  leur  enfance  estoyent  nourris  et  accoustumez  en  la  Loy:  mais  a  compris  les  nations  estranges  qui  auparavant  n'avoyent  sinon  toutes  superstitions  et  idolatries.  Car  le  Dieu  d'Israel  estoit  deboute  de  tout  le  monde,  on  le  mesprisoit,  et  les  Payens  avoyent  la  vraye  religion  en  mocquerie.  Or  il  est  dit  que  ceux  la  orront,  et  ayant  ouy,  qu'ils  entendront.  Par  ces  mots  le  Prophete  monstre  dont  vient  la  foy,  ascavoir  de  l'ouye  de  la  parolle  de  Dieu:  mais  cependant  il  signifie  aussi  que  ce  n'est  pas  le  tout  que  nous  ayons  les  aureilles  batues  de  la  predication  de  l'Evangile,  sinon  que  l'intelligence  y  soit  coniointe.  Or  cela  n'est  pas  donne  a  tous:  il  faut  donc  restreindre  ceste  sentence  aux  eleus  de  Dieu,  et  a  ceux  qui  sont  renouvelez  par  le  S.  Esprit:  comme  aussi  il  le  declare  plus  expressement  en  ce  qu'il  adiouste:  Qui  croira  a  nostre  doctrine?  Et  sur  qui  le  bras  du  Seigneur  sera-il  revele?  ou  despioye?  Yci  le  Prophete  s'arreste  au  milieu  de  son  propos  et  comme  en  s'estonnant  et  estant  esmerveille,  s'escrie.  Et  c'est  un  passage  qui  est  bien  digne  d'estre  note.  Nous  avons  veu  qu'il  exhortoit  les  fideles  a  magnanimite  et  constance,  comme  disont,  Mes  amis,  ne  soyez  esbahis  si  en  vostre  Redempteur  il  n'y  a  nulle  dignite,  et  qu'il  ne  soit  point  prise  du  monde:  mais  plustost  que  chacun  luy  crache  au  visage,  et  qu'on  le  despite,  et  qu'on  l'ait  mesmes  en  execration:  que  pour  tout  cela  vous  ne  soyez  point  desgoustez  de  luy.  Car  Dieu  l'avoit  ainsi  ordonne:  et  cependant  vous  voyez  la  fin:  c'est,  qu'estant  retire  des  abysmes  de  mort,  il  a  este  exalte  en  haut,  voire  pour  avoir  authorite  sur  toutes  creatures.  Ainsi  donc  que  vous  ne  laissiez  pas  d'adorer  ce  Redempteur  qui  s'est  ainsi  humilie  pour  vostre  bien.  Et  de  faict  il  l'accompare  a  la