5:603  ACTES  DE  RATISBONNE.  compense,  pour  nomination,  presentation,  election,  examen,  approbation  ou  provision  temporelle  des  Ministres,  soubz  peine  de  estre  depose  du  ministere,  et  soubz  aultres  peines:  lesquelles  ont  ordonne  tant  les  loix  que  les  Canons.  Pourtant  il  ne  fauldra  d'oresenavant  souffrir  que  les  Eglises  d'Allemaigne,  ou  les  Pasteurs  d'icelles,  ayent  a  payer  au  Pape,  ou  a  ceux  de  sa  chancelerie  aucun  argent,  pour  leurs  confirmations,  collations,  dispenses,  ou  toutes  telles  marchandises  de  ceste  boutique  la.  Car  les  examens,  les  elections  et  confirmations  des  Pasteurs,  se  doyvent  faire  comme  les  Canons  le  commandent.  Quant  est  du  gouvernement  temporel  des  Eveschez,  on  en  pourra  aussi  constituer,  pour  l'utilite  publique,  que  rien  de  cela  ne  se  porte  a  Rome  ou  on  n'en  scaurait  bonnement  iuger.  Comme  nous  voyons  aussi,  qu'il  a  [fol.  l  l  l  ]  este  defendu  par  les  Canons  des  Conciles  Affricquains  et  aultres,  de  tirer  les  causes  en  lieux  si  loingtains.  Or  pour  bien  desraciner  ceste  peste  de  simonie,  et  aller  au  devant  de  toutes  vilaines  praticques  et  mauvaises:  il  fauldra  aussi  remettre  sus  les  Canons,  qui  defendent  de  promouvoir  aucuns  aux  ordres  ecclesiastiques  absolument,  c'est  a  dire  sinon  qu'il  ayt  certain  ministere,  lequel  il  puisse  exercer  en  personne.  Item,  de  pourveoir  un  mesme  homme  de  plusieurs  benefices,  ou  assigner  plus  grand  sallaire  a  quelqu'un  que  son  ministere  ne  requiert.  Il  fauldra  aussi  restituer  cela,  que  entre  les  ministeres  de  l'Eglise,  tant  a,  la  dignite,  comme  au  revenu,  on  observe  l'ordre,  que  monstrent  tant  les  sainctes  escriptures  que  les  Canons.  C'est  que  ceulx,  qui  ont  charge  d'ames,  et  sont  pour  administrer  la  doctrine  et  les  Sacremens,  soyent  preferez  a  ceux  qui  sont  en  office  moindres,  et  moins  necessaires,  comme  lecteurs  et  chantres.  Car  il  est  notoire,  combien  les  anciens  Peres  ont  reprouve,  que  on  preferast  les  Diacres  aux  Prestres.  C'est  doncques  chose  beaucoup  plus  absurde,  que  ceux  qui  n'ont  aultre  office  que  de  chanter,  soyent  en  plus  grand  estime,  *  que  ceux  qui  exercent  office  de  vrays  Prestres,  c'est  a  dire  Pasteurs  d'Eglise.  Toutes  ces  choses  premises  sont  requises  au  ministere  ecclesiastique,  tant  du  commandement  de  Dieu,  que  par  les  Canons  anciens  et  les  loix  imperiales.  Parquoy,  s'il  est  question  de  faire  vraye  reformation,  il  les  fault  remettre  en  usage  et  les  observer.  Car  il  ne  fault  iamais  esperer  restitution  de  la  discipline  ecclesiasticque,  si  elle  n'est  redressee  premierement  entre  les  ministres,  affin  de  donner  puis  apres  bon  exemple  au  reste  du  peuple.