40:603  603  PRAELECTIONES  604  frangenda  et  conterenda  essent  quatuor  regna,  quae  in  visione  ostensa  fuerant  regi  Nebuchadnezer:  iam  videndum  est  an  sit  illud  regnum  Christi,  necne.  Verba  autem  prophetae  sic  habent,  44.  Et  in  diebus  illis  regum  illorum  suscitabit  Deus  coelorum  regnum,  quod  in  saeculum  non  dissipabitur  (vel,  non  destruetur),  et  regnum  (hoc)  populo  alieno  non  derelinquetur:  confringet  et  conteret  omnia  illa  regna:  et  ipsum  stabit  perpetuo.  45.  Propterea  vidisti,  nempe  e  monte  excisum  lapidem,  et  absque  manu,  qui  confregit  (et  confregit,  ad  verbum:  sed  copula  debet  resolvi  in  relativum)  ferrum,  aes,  testam,  argentum  et  aurum:  Deus  magnus  patefecit  regi  quid  futurum  esset  postero  tempore:  et  verum  est  somnium,  et  fidelis  interpretatio  eius.  Iudaei  nobiscum  in  hoc  consentiunt,  non  posse  aliter  intelligi  locum  hunc  quam  de  perpetuo  Christi  regno,  et  libenter  etiam,  atque  adeo  cupide  trahunt  in  gloriam  gentis  suae  quidquid  passim  legitur  in  scriptura:  imo  saepe  depravant  multa  testimonia,  ut  possint  stulte  gloriari  de  suis  privilegiis.  Non  igitur  negant  somnium  fuisse  oblatum  regi  babylonio  de  regno  Christi:  sed  in  eo  a  nobis  dissident,  quod  exspectant  suum  Christum:  et  ideo  coguntur  multis  modis  vaticinium  hoc  corrumpere:  quia  si  concedant  quartum  imperium,  vel  quartam  monarchiam  debere  ad  Romanos  referri,  iam  necesse  est  ipsos  acquiescere  evangelio,  quod  testatur  exhibitum  fuisse  Christum,  qui  promissus  fuerat  in  lege.  Daniel  enim  hic  aperte  affirmat,  post  finem  quartae  monarchiae  venturum  esse  Christum.  Ergo  confugiunt  ad  miserum  asylum,  quod  scilicet  quarta  monarchia  intelligi  debeat  de  regno  turcico,  quod  ipsi  Ismaelitarum  vocant:  et  ita  confundunt  imperium  romanum  cum  macedonico.  Sed  quidnam  habent  coloris,  ut  conficiant  ex  duobus  tam  diversis  imperiis  unum  duntaxat?  Dicunt  Romanos  oriundos  esse  a  Graecis.  Quod  si  detur:  unde  turcica  origo?  annon  e  monte  Caspio  prodierunt  et  maiore  Asia?  Romani  ad  Ilium  referunt  suam  originem:  hoc  iam  obsoletum  erat,  quo  tempore  debuit  vaticinium  hoc  compleri:  sed  quid  hoc  ad  rem,  quum  nullum  illis  fuerit  nomen  mille  post  annis?  Turcae  autem  longiori  tempore  transacto,  nempe  sexcentis  post  annis,  repente  instar  diluvii  irruperunt.  In  tanta  rerum  omnium  varietate  et  temporum  distantia  quomodo  regnum  unum  efficient?  Deinde  nihil  afferunt,  quod  non  commune  sit  reliquis  gentibus.  Nam  revocant  nos  ad  ipsius  mundi  exordia,  ut  possint  conflare  regnum  unum  ex  duobus.  Mixtura  igitur  illa  prorsus  et  ratione  et  colore  etiam  caret.  Et  non  dubium  est,  quin  Daniel  quartum  regnum  designet  in  Romanis  :  quia  heri  vidimus  fuisse  hoc  quasi  praeter  naturam,  quod  imperium  illud  in-