49:602  qu'il  m'a  apportees.  Et  quelle  horrible  condamnation  y  a-il  en  cela  ?  Autant  en  est-il  de  la  Cene.  Les  meschans,  et  tous  contempteurs  de  Dieu,  toutes  gens  de  vie  meschante  et  dissolue  pourront  bien  iouir  avec  les  fideles  des  signes  que  Dieu  leur  offre:  mais  le  tout  revient  a  leur  condamnation  plus  grande.  Avisons  donc  que  les  privileges  qui  nous  sont  donnez,  ne  sont  pas  pour  nous  faire  glorifier,  sinon  que  nous  en  usions  comme  il  appartient.  Et  au  reste,  afin  que  nous  ne  cuidions  point  que  ce  qui  a  este  fait,  ou  est  advenu  aux  Peres  qui  ont  vescu  sous  la  Loy  ne  nous  attouchent  en  rien.  Sainct  Paul  dit  que  ce  nous  sont  comme  figures.  Il  est  vray  que  ce  mot  sera  expose  plus  a  plein  une  autre  fois:  car  maintenant  tout  ne  ne  se  peut  pas  despecher:  mais  si  faut-il  notter  pourquoy  c'est  que  sainct  Paul  a  voulu  adiouster  ceste  sentence.  C'est  comme  i'ay  dit,  afin  qu'en  lisant  les  histoires  de  l'Escriture  saincte  nous  applicquions  le  tout  a  nostre  profit,  et  que  nous  soyons  enseignez  de  cheminer  en  la  crainte  de  nostre  Dieu,  d'adherer  a  ses  promesses,  et  y  estre  appuyez,  de  l'invoquer  en  toute  purete,  de  nous  glorifier  en  luy  seul  d'avoir  toute  nostre  confiance  en  Iesus  Christ.  Voyla  (di-ie)  de  quoy  nous  devons  estre  enseignez.  Et  a  l'opposite,  quand  nous  voyons  que  Dieu  a  chastie  les  contempteurs  de  sa  maieste,  ceux  qui  ont  mesprise  sa  Parole,  ceux  qui  ont  abuse  de  son  Nom,  ceux  qui  se  sont  desbordez  en  toute  iniquite:  quand  donc  nous  voyons  que  Dieu  a  ainsi  estendu  sa  main  pour  Ies  punir,  que  nous  soyons  bridez  par  cela,  et  cognoissons  que  Dieu  sera  aussi  bien  nostre  Iuge.  Voyla  donc  en  somme  a  quoy  sainct  Paul  a  regarde,  c'est  qu'il  ne  veut  pas  qu'on  lise  les  histoires  comme  pour  s'esbatre,  mais  qu'on  en  recoyve  doctrine,  et  que  nous  regardions  de  quoy  cela  nous  peut  servir.  Car  il  est  certain  que  toute  l'Escriture  est  utile,  comme  S.  Paul  le  dit.  Il  n'y  a  rien  de  superflu,  tout  est  profitable.  Et  a  quoy?  A  doctrine,  a  instruction,  pour  nous  admonester,  pour  nous  reprendre,  quand  besoin  sera,  pour  nous  amener  a  ceste  perfection,  a  laquelle  Dieu  nous  appelle  et  exhorte,  Et  ainsi  notons  bien  quand  nous  venons  pour  lire  l'Escriture  saincte,  que  Dieu  nous  propose  la,  comme  en  un  miroir  devant  les  yeux,  de  quoy  nous  confermer  tousiours  de  plus  en  plus  et  en  ses  promesses  et  en  l'obeissance  de  sa  Loy,  et  en  tout  ce  qui  appartient  a  sainctete  de  vie,  et  qui  peut  servir  a  nostre  salut.  Voyla  donc  comme  ce  qui  est  advenu  aux  Peres  anciens,  nous  doit  auiourd'huy  servir  de  figure  ou  d'image  pour  contempler  la  main  de  Dieu,  afin  que  nous  ne  soyons  point  nonchalans,  et  qu'il  ne  nous  adviene  point  de  nous  flater  en  nos  vices.  Or  la  dessus  sainct  Paul  adiouste  certaines  especes.  Et  en  premier  lieu  il  dit,  Que  nous  ne  41