32:602  general:  ie  parle  des  fideles.  Quand  nostre  Seigneur  dit,  Ie  recoy  tous  pecheurs  a  mercy:  que  chacun  dise,  I'en  suis  un,  Seigneur,  ie  suis  une  povre  creature  desesperee,  ie  vien  a  toy,  et  t'allegue  la  promesse  que  tu  m'as  donnee.  Voyla  comme  il  nous  en  faut  faire:  ou  autrement,  nous  ne  ferons  que  vaguer  en  l'Escriture  saincte  tout  le  temps  de  nostre  vie.  Il  s'ensuit  puis  apres,  Que  tes  misericordes  me  viennent,  et  ie  vivray:  car  tous  mes  plaisirs  sont  en  ta  Loy.  En  ce  verset  nous  voyons  bien  que  David  a  este  comme  eslongne  de  la  misericorde  de  Dieu.  Or  c'est  encores  un  poinct  bien  notable:  car  qui  est  cause  de  nous  desfier,  iusques  a  nous  fermer  la  porte,  pour  ne  point  venir  a  Dieu,  sinon  d'autant  qu'il  nous  semblera  que  Dieu  se  soit  eslongne  de  nous,  et  que  nous  demeurions  la  confus?  Il  est  vray  que  quelquesfois  il  nous  fera  sentir  comme  il  s'est  destourne  de  nous,  voire  a  cause  que  nous  l'avons  premierement  delaisse:  mais  si  faut-il  neantmoins  retourner  a  luy,  et  ne  point  perdre  courage  a  l'exemple  de  David,  que  combien  que  les  misericordes  de  Dieu  soyent  eslongnees  de  nous  selon  l'apparence,  selon  nostre  opinion,  et  ce  que  nous  pourrons  appercevoir:  que  toutesfois  nous  ne  laissions  pas  de  dire,  Seigneur,  que  tes  misericordes  viennent  a  moy:  elles  en  sont  loin,  voire  en  apparence,  et  selon  qu'il  m'en  semble:  mais  si  est-ce,  Seigneur,  que  tu  les  feras  parvenir  iusques  a  moy:  et  combien  que  tu  ne  me  les  monstres  pas,  toutesfois,  ie  les  attendray,  et  seray  conferme  en  foy  et  en  esperance,  Et  au  reste,  quand  il  adiouste,  Ie  vivray:  c'est  pour  signifier  ce  que  desia  nous  avons  dit:  c'est  ascavoir,  que  cependant  que  son  esprit  s'est  arreste  aux  creatures,  qu'il  a  este  comme  mort,  cependant  qu'il  luy  a  semble  que  Dieu  ne  luy  fust  point  propice,  il  estoit  comme  esvanouy.  Et  de  fait,  quand  nous  aurions  tout  le  monde  pour  nous,  et  cependant  que  Dieu  nous  soit  contraire,  et  que  nous  n'ayons  point  ce  tesmoignage,  qu'il  nous  aime  et  nous  favorise,  tout  le  reste  ne  sera  que  ruine  et  confusion.  Et  si  nous  ne  l'estimons  ainsi,  ne  faut-il  pas  bien  que  nous  soyons  ensorcelez  de  Satan,  et  qu'il  nous  ait  transportez  du  tout,  quand  nous  voulons  seulement  nous  contenter  de  ces  choses  terrestres,  et  que  nous  ne  regardons  point  a  la  source  et  a  la  fontaine  de  tout  bien,  ascavoir,  a  la  bonte  de  Dieu?  Mais  cependant  notons,  que  combien  que  nous  soyons  morts  pour  un  temps  a  l'exemple  de  David,  si  est  ce  que  nous  serons  vivifiez,  voire  si  nous  venons  a  Dieu,  en  le  priant  qu'il  n'eslongne  point  ses  misericordes  de  nous.  Or  il  dit  en  la  fin,  Mes  plaisirs  sont  en  ta  Loy.  Par  cecy  nous  sommes  admonestez  comme  c'est  que  nous  pouvons  demander  a  Dieu  a  bon  escient,