5:600  selon  l'ordre  et  forme,  que  nous  descrivent  les  Canons  anciens.  Et  qu'iceux  Pasteurs  soyent  suffisans  a,  exercer  leur  office  et  s'acquiter  de  la  charge  des  ames,  tant  en  enseignant  que  distribuant  les  Sacremens,  et  faisant  les  corrections  ecclesiasticques:  et  que,  a  certain  temps  assigne,  ilz  se  trouvent  aux  Synodes,  avec  un  ou  deux  de  leurs  Prestres,  et  la  ayent  puissance  de  dire  leur  opinion  et  exercer  les  iugemens  ecclesiasticques,  selon  que  requierent  les  ordonnances  des  Conciles  anciens.  D'autrepart,  affin  que  les  Princes,  qu'on  tient  maintenant  pour  Evesques,  qui  administrent  temporellement  les  seigneuries  ecclesiastiques,  profitent  en  leur  estat  aux  Eglises:  comme  il  est  bien  raisonnable,  que  specialement  par  dessus  les  aultres,  ilz  s'efforcent  de  ce  faire:  il  sera  expedient,  qu'ilz  soyent  commis  deffenseurs  des  vrays  Ministres  et  les  ay  den  t,  [fol.  107]  tant  a  tenir  leurs  Synodes  que  a  faire  leurs  visitations  et  le  reste  qui  appartient  a  leur  ministere.  Item,  qu'ilz  aient  le  soing,  que  les  biens  qu'on  a  aultrefois  donne  a  l'Eglise,  et  qu'on  pourroit  encor  donner,  tant  pour  nourrir  les  ministres,  que  pour  entretenir  ceulx  qu'on  prepare  au  ministere,  soient  fidelement  conservez  et  emploiez  en  tel  usage  qu'on  les  a  destine.  Item,  que  la  discipline  exterieure  et  honnestete  de  vie,  la  paix  publique  et  la  tranquillite  soit  conservee.  Voila  les  choses  auxquelles  se  deveroient  emploier  ces  princes  ecclesiastiques.  Mais  cela  se  devera  faire,  par  tel  moyen,  que  par  leur  defense,  aide  et  superintendence,  le  ministere  de  ceulx  qui  tiendront  le  lieu  de  vrais  pasteurs,  et  auront  la  cure  des  ames,  ne  soit  en  rien  empesche,  diminue,  restrainct,  ne  viole,  soit  a  tenir  les  Synodes,  ou  faire  les  visitations,  ou  a  corriger  les  rebelles;  ne  pareillement  l'office  des  Princes  et  iusticiers  ordinaires  du  lieu,  soit  a  conduire,  ou  defendre,  ou  chastier,  et  a  faire  tout  ce  que  les  canons  anciens  et  constitutions  des  Empereurs  chrestiens  leur  permettent  selon  la  loy  de  Dieu,  tant  sur  les  personnes  que  sur  les  biens.  De  ceste  separation,  distinction  et  moderation  du  gouvernement  civil  et  ecclesiastique,  il  adviendroit  que  quant  a  la  conduite  exterieure  des  choses,  tout  demeureroit  en  tel  estat  et  condition  qu'il  est  maintenant:  et  n'osteroit  on  rien  a  personne,  ne  de  sa  dignite,  ne  de  son  profit  qu'il  a  de  present,  ou  qu'il  peult  obtenir  par  les  loix  et  coustumes  ia  receues.  Cependant  on  auroit  ce  qui  est  le  principal  et  le  plus  necessaire,  que  l'Eglise  recouvreroit  ce  dont  elle  a  este  long  temps  miserablement  et  avec  si  gros  detriment  destituee:  ascavoir  le  ministere  et  la  solicitude  que  Dieu  veult  qu'on  en  ait,  et  comme  aussi  il  a  este  ordonne  par  les  conciles  anciens.  Or  que  le  gouvernement  spirituel  soit  ainsi