49:600  ment  des  promesses  de  Dieu  :  il  y  en  viendra  d'autres  qui  seront  ennemis,  de  malice  ou  de  haine  et  rancune:  les  autres  croupiront  en  leurs  iniquitez,  soit  de  paillardise,  d'yvrongnerie  ou  de  blasphemes.  Et  bien,  ceux  la  ne  sont  point  capables  de  participer  a  nostre  Seigneur  Iesus  Christ.  Il  est  certain.  Ii  est  vray  qu'ils  recoivent  bien  le  signe  :  mais  que  Iesus  Christ  habite  en  eux,  il  est  impossible.  Car  quelle  convenance  ha-il  avec  nos  pollutions,  sinon  d'autant  qu'il  les  nettoye  et  les  efface  et  abolit?  Mais  quand  nous  y  voudrons  demeurer,  il  est  certain  que  nous  serons  retranchez  de  luy  et  de  son  corps  comme  membres  pourris.  Ainsi  donc  celuy  qui  participe  a  la  Cene,  quelque  fois  n'aura  rien  de  commun  avec  Iesus  Christ:  la  Cene  pour  cela  estelle  amoindrie?  a-elle  change  d'usage?  n'est-ce  pas  un  Sacrement  spirituel  en  somme?  Si  est.  Cognoissons  donc  que  Dieu  demeure  tousiours  certain  en  ses  promesses,  et  ne  varie  point  :  qu'il  ne  change  point  pour  la  malice  des  hommes.  Ainsi  quand  on  viendra  recevoir  la  Cene  d'une  conscience  mauvaise,  pour  cela  le  Sacrement  ne  change  pas:  mesmes  encores  que  le  ministre  fust  meschant.  Prenons  le  cas  qu'il  y  eust  un  ministre  qui  fust  malin,  un  diable,  un  contempteur  de  Dieu,  non  seulement  de  vie  dissolue,  mais  sans  foy,  sans  religion  :  celuy-la  ne  peut  amoindrir  l'usage  du  Sacrement  ni  sa  vertu.  Et  pourquoy?  ce  n'est  pas  une  chose  qui  depende  du  coste  des  hommes.  Il  y  a  bien  eu  ceste  bestise  en  la  Papaute,  et  est  encores,  de  dire  qu'en  la  Messe  la  consecration  se  fait  selon  l'intention  du  Prestre.  Or  il  est  vray  qu'ils  peuvent  gazouiller  de  leurs  charmes  et  enchantemens  infernaux  tout  ce  qu'ils  voudront:  car  cela  n'approche  pas  des  Sacremens.  Mais  encore  on  voit  comme  ils  ont  este  hebetez  du  tout,  en  disant  que  si  un  prestre  ha  intention  de  consacrer,  il  faut  que  Iesus  Christ  soit  subiet  a  son  appetit:  mais  s'il  ne  le  veut  faire,  ce  ne  sera  rien:  et  tout  le  peuple  sera  la  mocque.  Quelle  bestise?  Et  toutesfois  ce  n'est  pas  une  fantasie  du  commun  populaire:  mais  c'est  une  resolution  qui  est  determinee,  en  sorte  qu'on  seroit  brusle  pour  y  avoir  contrarie.  Or  maintenant  regardons  si  les  hommes  mortels  pourront  defrogner  a  la  volonte  du  Fils  de  Dieu,  qui  est  immuable.  Voyla  nostre  Seigneur  Iesus  Christ  qui  nous  appelle  et  convie  a  sa  Cene:  ii  veut  que  ceste  promesse  soit  publiee  par  tout,  Voyla  mon  corps:  si  cela  gist  en  l'intention  d'un  homme  que  le  corps  de  Iesus  Christ  nous  soit  donne,  et  que  sera-ce?  Car  comme  nous  disons,  le  Sacrement  ne  depend  point  de  la  vertu  des  hommes,  mais  il  demeure  tousiours  en  sa  nature,  comme  Dieu  est  fidele,  et  ne  varie  point.  Quand  donc  nous  prendrons  le  pain  de  la  Cene  qui  est  sanctifie  pour  nous,  voyla  un  gage  du  corps  de  nostre  Seigneur