48:600  ne  soit  le  vray  Baptesme  qu'il  administre,  car  nous  ne  regardons  pas  au  signe  mais  a  la  verite,  et  encores  le  signe  est  convenable  a  celuy  de  Iesus  Christ.  Mais  le  principal  que  nous  avons  au  Baptesme  consiste  en  deux  points:  c'est  que  nous  sommes  despouillez  du  vieil  Adam,  renouvelez  et  unis  a  Iesus  Christ,  et  que  nous  sommes  purgez  de  nos  macules  quand  Dieu  nous  pardonne  nos  pechez.  Voyla  la  somme  du  Baptesme.  Or  maintenant  regardons  si  Iehan  n'a  pas  fait  tout  cela.  Il  est  certain:  car  il  est  venu  preschant  la  remission  des  pechez,  et  a  administre  le  Baptesme  a  ceste  fin.  D'avantage,  en  baptizant  il  a  presche  repentance,  qui  emporte  ce  que  nous  avons  dit,  que  nous  soyons  mortifiez  quant  a  nous,  et  que  ceste  corruption  que  nous  avons  d'Adam  soit  abolie,  afin  que  la  iustice  de  Dieu  regne  en  nous.  Ainsi  quand  nous  aurons  bien  tout  espluche,  nous  n'y  trouverons  autre  chose.  Mais  quoy?  Il  faut  bien  discerner  entre  la  personne  du  ministre,  et  la  personne  de  Iesus  Christ.  Vray  est  que,  quand  on  parle  du  Baptesme  en  soy,  c'est  le  lavement  de  nos  pechez.  Pourquoy  ?  Pource  que  par  iceluy  nous  sommes  confermez  que  nous  sommes  entez  en  Iesus  Christ,  afin  que  nous  soyons  purifiez  et  que  nous  vivions  par  sa  vertu.  L'Escriture  parle  ainsi:  comme  nous  voyons  que,  quand  Ananias  baptize  S.  Paul,  il  luy  dit,  Vien  et  te  lave  de  tes  pechez.  Mais  aussi  il  n'est  pas  seulement  question  du  signe  quand  on  parle  du  Baptesme,  mais  de  la  verite  la  signifiee:  ascavoir  d'estre  agreable,  a  Dieu  par  la  remission  des  pechez,  d'estre  renouvelez  par  son  sainct  Esprit,  afin  que  nous  ne  vivions  plus  a  nous-mesmes.  Et  pourquoy  disons-nous  que  tout  cela  est  compris  au  Baptesme?  Pourtant  que  la  commission  de  Iesus  Christ  est  sans  doute  et  certaine:  et  il  accomplit  au  dedans  ce  qu'il  signifie  par  dehors.  Autrement  ce  seroit  iouer  une  farce  sur  l'eschafaut,  si  la  verite  n'estoit  coniointe  avec  le  signe.  Voyla  donc  comment  Dieu  conioint  la  verite  avec  le  signe,  afin  que  nous  cognoissions  que,  tout  ainsi  que  le  signe  visible  signifie,  aussi  nous  recevons  les  graces  la  signifiees.  Autant  en  pourroit-on  dire  de  la  Cene.  Quand  nous  recevons  la  Cene,  comme  le  ministre  nous  distribue  le  pain  et  le  vin,  Iesus  Christ  nous  fait  participans  de  son  corps  et  de  son  sang,  afin  que  nous  soyons  vrayement  ses  membres,  et  par  ce  moyen  on  dira  que  la  Cene  est  la  communication  du  corps  et  du  sang  de  nostre  Seigneur.  Mais  quand  ce  vient  a  traitter  a  part  ce  que  l'homme  mortel  fait,  alors  il  faut  regarder  quelle  puissance  il  ha.  Quand  ie  baptize,  ascavoir  si  i'ay  le  S.  Esprit  en  ma  manche  pour  le  donner?  ou  le  corps  et  le  sang  du  Seigneur  pour  le  donner  a  qui  bon  me  semble?  Ce  seroit  trop  s'eslever  de  vouloir  attribuer  aux  creatures  mortelles  ce  qui  appartient  a  Iesus  Christ.  N'ostons  donc  point  l'office  de  Iesus  Christ^