35:600  Il  appelle  folie  de  Dieu  ce  que  nostre  Seigneur  Iesus  a  este  ainsi  abbatu:  car  si  les  hommes  veulent  yci  asseoir  iugement,  il  est  certain  qu'ils  diront  que  c'est  une  chose  absurde.  Et  comment?  Que  celuy  qui  doit  estre  adore  au  ciel  et  en  la  terre,  soit  expose  a  tel  opprobre?  Et  a  quel  propos?  Voyla  donc  comme  les  hommes,  selon  leur  arrogance  et  presomption,  condamneront  tousiours  avec  une  temerite  et  audace  si  grande  que  rien  plus.  tout  ce  que  Dieu  fait  pour  leur  redemption:  mais  tant  y  a  que  Dieu  en  son  conseil  monstrera  qu'il  ha  plus  de  sagesse  que  tous  les  hommes  ne  pourroyent  concevoir.  Et  pourtant,  qu'en  premier  lieu  nous  tenions  cela  tout  resolu,  que  si  nostre  Seigneur  Iesus  a  este  contemptible,  et  que  non  seulement  il  se  soit  abbaisse  pour  nous,  mais  qu'il  se  soit  aneanti  du  tout  (comme  sainct  Paul  en  parle),  que  nous  ne  laissions  pas  de  luy  attribuer  l'honneur  qui  luy  appartient:  car  sa  gloire  n'a  pas  este  amoindrie  pour  cela,  combien  qu'elle  n'a  pas  este  cognue  de  tous:  mais  sa  bonte  a  eu  tant  plus  grand  lustre.  Et  aussi  nous  devons  estre  ravis  en  estonnement,  voyans  que  le  Fils  de  Dieu  n'a  pas  refuse  d'estre  comme  desfigure,  luy  qui  est  comme  l'image  de  Dieu  son  Pere:  et  le  tout  afin  que  ceste  image  fust  reparee  en  nous.  Car  il  est  certain  que  nous  sommes  si  remplis  de  macules,  qu'en  comparaissant  devant  Dieu,  il  faut  que  nous  soyons  reiettez,  iusques  a  ce  que  nostre  Seigneur  Iesus  nous  imprime  sa  marque,  en  laquelle  nous  puissions  venir  pour  estre  agreables  a  Dieu  et  pour  trouver  faveur  devant  luy.  Ainsi  quand  il  nous  est  dit  qu'il  a  este  desfigure,  regardons  a  nous,  et  cognoissons  qu'il  faloit  bien  qu'il  receust  toutes  nos  taches  et  macules,  afin  que  nous  en  fussions  purgez  et  nettoyez,  et  que  maintenant  nous  n'apportions  au  iugement  de  Dieu,  sinon  iustice  et  sainctete,  laquelle  nous  n'aurions  point  si  Dieu  ne  nous  la  communiquoit  en  Iesus  Christ.  Or  la  dessus  il  adiouste,  que  les  Bois  mesmes  clorront  leur  bouche  quand  U  aura  este  ainsi  exalte,  et  quand  ils  verront  un  tel  changement,  lequel  iamais  les  hommes  n'eussent  pense.  Il  monstre  donc  yei  qu'il  ne  faut  pas  iuger  a  la  volee,  quand  nous  voyons  que  nostre  Seigneur  Iesus  s'est  ainsi  humilie  et  mesmes  aneanti,  mais  qu'il  faut  regarder  la  fin,  et  a  quoy  Dieu  le  Pere  l'a  amene:  c'est  qu'un  Nom  luy  a  este  donne  souverain  par  dessus  tous,  tellement  qu'il  faut  que  tout  genouil  soit  ploye  devant  luy:  comme  sainct  Paul  parle  au  second  chapitre  des  Philippiens.  Car  quand  il  nous  a  exhortez  a  modestie,  et  monstre  que  nous  ne  devons  pas  nous  priser,  il  nous  propose  le  miroir  et  patron  de  nostre  Seigneur  Iesus  Christ.  Celuy,  dit-il,  qui  est  vray  Dieu,  et  auquel  ce  n'eust  pas  este  rapine  quand  il  fust  apparu  en  sa  gloire  celeste,  s'est  aneanti,  et  a  pris  l'estat  et  condition  d'un  serviteur:  et  mesmes