9:60  dum  turbarum  autoribus  repugnat.  Tandem  se  ad  obiecta  crimina  responsurum  promittit.  [pag.  30]  Ac  primae  quidem  partis  hoc  bellum  exordium  est,  me  Consensum  nostrum  ex  aliquot  vocum  synonymia  probare,  quales  sunt  Figura,  Signum,  Symbolum.  Itaque  miratur  me  non  etiam  ex  syllabis  idem  colligere.  Sed  quid  si  hic  manifesto  in  mendacio  eum  pueri  deprehendant?  Nunquam  enim  mihi  in  mentem  venit,  hanc  verborum  affinitatem  obtendere  ad  probandum  nostrum  Consensum.  Sed  quum  ipse  clamose  istas  voces  exagitasset,  imo  scripsisset  hac  contradictionis  nota  nos  prodi  haereticos,  simpliciter  derisi  hominis  stultitiam,  ut  digna  erat.  Nunc  tamen  ac  si  elapsus  esset,  se  multo  plus  largiri  gloriatur,  nos  scilicet  non  solum  in  paucis  voculis,  sed  in  rebus  et  sententiis  convenire.  Atque  ut  facetus  appareat,  se  cohonestare  dicit  uno  hoc  nomine  sacramentarios  omnes,  quod  inter  se  consentiant.  Sed  crassius  est  eius  cavillum,  quam  ut  sub  hac  frivola  iactantia  deliteat.  Magna  verborum  atrocitate  nos  pro  haereticis  traduxit,  quia  inter  nos  dissentimus.  Demonstratio  [pag.  31]  haec  ei  optima  visa  est,  quia  alius  panem  coenae  symbolum,  alius  figuram,  alius  signum  vocat,  palam  nos  dissentire:  ac  suam  hanc  argutiam,  quo  splendidior  esset,  in  tabula  depinxit.  Ego  quid  fecissem?  Fuitne  omittendum,  quod  me  tacente  omnibus  occurrit,  Consensum  nostrum  non  potuisse  melius  probari?  Longius  etiam  progrediar,  si  quando  lucem  doctrinae  meae  afferre  velim,  eius  explicationem  petere  ab  his  vocibus.  An  me  ideo  pugnantia  loqui,  vel  mihi  contrarium  esse  finget,  quia  rem  unam  pluribus  modis  commodius  interpretari  studeam?  Propius  conserta  manu  eum  premam.  Quicunque  aliter  verba  Christi  exponunt,  quam  secundum  literam,  ut  vulgo  loquuntur,  eos  non  dubitat  sacramentarios  facere.  Mihi  placet  conditio:  ita  enim  Augustinus  in  ordinem  nostrum  relegatur.  Scripsit  adversus  Faustum,  Dominum  dixisse:  Hoc  est  corpus  meum,  quum  signum  daret  corporis  sui.  Quando  figurate  Christi  verba  exponit,  sacramentarius  haud  dubie  censebitur,  [pag.  32]  Alibi  propter  similitudinem  rei  signatae  corpus  et  sanguinem  vocari  tradit,  corporis  et  sanguinis  sacramentum.  Nonne  autore  Westphalo,  haec  nefanda  verborum  Christi  laceratio  est?  Alibi  scribit,  Dominum  in  coena  corporis  et  sanguinis  sui  figuram  discipulis  commendasse  et  tradidisse.  Duosne  ex  nobis  reperiet  magis  inter  se  dissentientes,  quam  Augustinus  dissentit  ipse  secum?  Frustra  igitur  negat  se  desipuisse  Westphalus,  quum  in  vocibus  prope  synonymis  proposuit  horrendi  dissidii  paradigma.  Negat  argumentationem  ex  particulari  deductam  valere:  quasi  per  omnia  inter  nos  conveniat,  quia  in  aliquibus  idem  sentimus  et  loquimur.  Ego  vero  me  unquam  ita  ratiocinatum  esse  nego:  quia  tam  absur-