47:60  quo  turgent  exinaniti  fuerint.  Porro  hoc  ad  domandum  fastum  aptissime  illi  obiicitur:  nam  in  quo  sibi  maxime  videtur  acutus  et  prudens,  eius  inscitiam  Christus  exagitat.  Hoc  gravitatis  et  perspicaciae  esse  ducebat,  rem  impossibilem  non  admittere,  quia  stulte  credulus  est,  qui  alterius  dictis  nondum  bene  comperta  ratione  annuit.  Sed  interea  ridiculus  est  Nicodemus  cum  suo  magistrali  supercilio,  quod  in  primis  elementis  magis  quam  pueriliter  haesitat.  Talis  certe  dubitatio  turpis  ac  pudenda  est.  Qualis  enim  religio,  qualis  Dei  notitia,  qualis  regula  bene  vivendi,  qualis  spes  vitae  aeternae,  nisi  tenemus  hominem  spiritu  Dei  renovari?  Est  ergo  emphasis  in  voce  haec.  Quia  enim  hanc  doctrinae  partem  scriptura  identidem  inculcat,  ne  postremis  quidem  tironibus  ignota  esse  debet.  Nullo  itaque  modo  ferendum  est,  ut  eius  ignarus  sit  ac  rudis,  qui  doctorem  se  in  ecclesia  Dei  profitetur.  l  l  .  Quod  novimus  loquimur.  Quidam  ad  Christum  et  Ioannem  Baptistam  hoc  referunt:  alii  numerum  pluralem  loco  singularis  positum  esse  dicunt.  Ego  vero  non  dubito  quin  se  Christus  omnibus  Dei  prophetis  coniungat,  et  communiter  loquatur  in  omnium  persona.  Philosophi  enim  aliique  ventosi  doctores  nugas  saepe  quas  commenti  sunt  ingerunt:  hoc  autem  Christus  sibi  et  omnibus  Dei  servis  tanquam  proprium  vindicat,  quod  nonnisi  certam  doctrinam  tradunt.  Neque  enim  mittit  Deus  qui  de  rebus  ignotis  vel  dubiis  garriant,  sed  eos  in  schola  sua  format,  ut  quae  ab  ipso  didicerint,  aliis  deinde  tradant.  Porro  sicut  Christus  hoc  elogio  doctrinae  suae  certitudinem  nobis  commendat,  ita  suis  omnibus  ministris  legem  modestiae  praescribit,  ne  propria  somnia  vel  coniecturas  obtrudant,  ne  in  medium  proferant  humana  figmenta  quibus  nihil  solidi  subest,  sed  fidele  ac  purum  Deo  testimonium  reddant.  Videat  ergo  quisque  quid  sibi  a  Domino  revelatum  sit,  ne  quis  fidei  suae  metas  transsiliat,  ne  quis  denique  sibi  loqui  permittat,  nisi  quod  a  Domino  audierit.  Notandum  etiam  est  quod  Christus  doctrinam  suam  iureiurando  hic  confirmat,  ut  plena  illi  apud  nos  constet  autoritas.  Testimonium  nostrum  non  recipitis.  Hoc  ideo  additur,  ne  quid  decedat  evangelio  ob  hominum  ingratitudinem.  Quia  enim  apud  paucos  fidem  invenit  Dei  veritas,  passim  vero  repudiatur  a  inundo,  a  contemptu  asserenda  est,  ne  ideo  minori  in  pretio  sit  eius  maiestas,  quod  illam  totus  fere  mundus  superbe  despicit,  et  sua  impietate  obscurat.  Quanquam  autem  simplex  et  unus  est  verborum  sensus,  duplex  tamen  ex  hoc  loco  doctrina  colligenda  est.  Prior,  ne  labascat  apud  nos  evangelii  fides,  si  paucos  in  terra  discipulos  habeat:  ac  si  diceret  Christus:  Utcunque  non  recipiatis  doctrinam  meam,  manet  nihilominus  certa  et  stabilis:  quia  nunquam  efficiet  hominum  incredulitas,  quin  Deus  perpetuo  verax