42:60  c'est  luy  qui  donne  entree  a  ce  tirant,  pour  abolir  et  aneantir  toute  la  religion.  Or  ie  vous  prie  quels  scandales  estoient  cela.  Ainsi  donc  il  nous  faut  bien  noter  ces  choses,  a  fin  que  nous  sachions  que  ce  n'est  point  sans  cause  que  l'ange  parle  ici  des  flateries,  et  il  est  bien  certain  que  c'est  la  plus  dangereuse  tentation  qu'il  y  en  ait  point,  et  ie  le  scai  quant  a  moy,  que  cela  est  plus  dangereux  beaucoup  que  si  on  estoit  entre  les  ennemis  de  la  foy,  et  qu'on  feist  allumer  le  feu,  ou  qu'on  fust  pres  d'endurer  d'autres  torments,  car  quand  on  y  va  ainsi  par  flateries  et  par  ces  mensonges,  cela  est  pour  faire  divertir  celuy  qui  seroit  le  mieux  conferme  du  monde,  et  comment  il  y  ba  tant  de  choses  qui  ne  se  pourroient  pas  faire,  et  ne  faut  il  pas  user  de  quelque  moien,  faut  il  aller  ainsi  rie  a  rie?  Il  est  bien  certain,  que  si  on  vouloit  suivre  la  pure  parole  de  Dieu,  qu'il  faudroit  faire  ainsi,  mais  si  on  l'entreprend,  et  que  sera  ce?  il  en  pourra  advenir  beaucoup  de  troubles  et  de  divisions,  et  puis  il  faut  supporter  l'ignorance  du  peuple,  on  n'en  peut  pas  chevir  ainsi  qu'on  voudroit  bien.  Et  ainsi  s'il  y  a  beaucoup  de  choses  mai  ordonnees  au  nom  de  Dieu,  et  si  on  travaille  pour  les  reformer,  que  y  gagnera  on?  qu'est  ce  qu'on  aura  proffite,  quand  (di-ie)  Sathan  y  viendra  par  une  telle  cautelle,  il  est  certain  qu'il  y  en  aura  beaucoup  qui  seront  divertis  du  droit  chemin,  car  on  viendra  mettre  en  avant,  et  comment  si  on  veut  ainsi  remuer  les  choses  cependant  que  tout  sera  en  trouble,  il  y  ha  danger  qu'il  y  ait  une  plus  grande  barbarie  en  la  Chrestiente,  qu'il  n'y  eust  iamais  au  monde,  car  voila  le  Turc  qui  pourra  venir  a  gaigner  tout,  et  puis  il  fera  que  la  Chrestiente  sera  tellement  abolie  qu'il  n'en  sera  plus  de  memoire.  Voila  (di-ie)  des  tentations  fort  dangereuses,  et  telles  qu'elles  seroient  pour  desgouter  tous  ceux  qui  avoient  deliberation  de  servir  a  Dieu,  comme  aussi  nous  l'avons  veu  de  nostre  temps  et  par  trop.  Ainsi  donc  notons  bien  ce  mot  de  flateries,  qui  est  mis  en  ce  passage,  qu'il  y  en  aura  plusieurs  qui  seront  divertis,  voire  par  les  flateries  que  feront  les  ennemis  de  la  foy.  Et  pourtant  prions  Dieu  qu'il  nous  donne  une  telle  fermete  et  constance,  que  comme  nous  voions  qu'il  ha  assiste  aux  siens  de  tout  temps,  qu'il  face  envers  nous  le  semblable,  et  que  nous  prenions  courage,  encores  qu'il  faille  que  nous  soions  affliges  en  ce  monde,  car  quand  nous  serons  conformes  a  nostre  Seigneur  Iesus  Christ,  en  ses  afflictions  et  en  sa  mort,  sachons  aussi  que  nous  serons  participans  de  la  gloire  de  sa  resurrection  comme  il  nous  y  ha  precedes,  a  fin  de  nous  monstrer  le  chemin,  et  de  nous  y  recueillir  tous  ensemble.  Suivant  cette  saincte  doctrine,  nous  nous  prosternerons  devant  la  face  de  nostre  bon  Dieu,  etc.