39:60  eos  ad  bene  sperandum:  sed  gratiam  Dei  testatur  fore  victricem  super  eorum  malitiam.  Audietur  ergo  vox  laetitiae,  et  vox  gaudii,  vox  sponsi,  et  vox  sponsae,  hoc  est  adhuc  nuptiae  celebrabuntur.  Haec  etiam  loquendi  forma  satis  frequenter  occurrit  apud  prophetas,  ubi  significant  laetum  urbis  et  populi  statum.  Nam  in  luctu  nemo  cogitat  de  uxore  ducenda,  et  nuptiae  tunc  cessant,  sicuti  omnes  dies  festi.  Ergo  propheta  breviter  ostendit  Deum  finem  malis  populi  impositurum  ut  suppeditet  ipsis  causam  laetitiae,  ubi  poenam  temporalem  sumpserit  de  ipsorum  peccatis,  sed  simul  ostendit  qualis  futura  sit  laetitia.  Vox  dicentium,  inquit,  Celebrate  Iehovam  exercituum.  Hic  discernit  fideles  a  profanis  hominibus,  quia  utrisque  communis  est  laetitia,  ubi  prospere  illis  succedit.  Licet  enim  filiis  Dei  gaudere,  quum  Dominus  re  ipsa  ostendit  se  illis  beneficum  patrem.  Sed  profani  exsultant  intemperantia  gaudii,  et  interea  nulla  apud  ipsos  Dei  mentio,  quia  subsistunt  duntaxat  in  bonis  praesentibus:  fideles  autem  erigunt  animos  ad  Deum,  et  nunquam  laetantur  sine  gratiarum  actione:  ita  consecrant  et  sanctificant  suum  gaudium,  quum  impii  omnia  Dei  beneficia  polluendo  gaudium  etiam  suum  contaminant.  Notandum  igitur  est  discrimen  quod  hic  statuit  propheta  inter  piam  et  profanam  laetitiam,  quia  filii  huius  saeculi  exsultant  quidem,  ut  diximus,  intemperanter  in  gaudio:  sed  Deo  ingrati  sunt,  neque  expendunt  eius  bonitatem,  imo  avertunt  data  opera  oculos,  et  sensus  suos  ab  eius  interitu:  fideles  autem  semper  in  Deum  respiciunt  quoties  prospere  illis  succedit,  quia  sciunt  hoc  totum  sibi  fluere  ex  mera  Dei  beneficentia.  Dicit  igitur,  Audietur  vox  dicentium,  Celebrate  Iehovam  exercituum,  quia  bonus  est.  Hic  alludit  propheta  ad  solennem  canendi  ritum,  qui  refertur  in  sacra  historia.  Scimus  enim,  quum  templum  dicatum  fuit,  celebratas  ita  fuisse  Dei  laudes,  ut  accinerent  semper  Levitae:  Quia  in  saeculum  misericordia  eius.  Primi  hortabantur  alios  ad  laudandum  Deum,  sed  singulis  sententiis  subiiciebatur  illa  repetitio,  Quia  in  saeculum  clementia  eius.  Quod  ergo  in  solenni  usu  pridem  fuerat,  nunc  commemorat  propheta,  Audietur  ergo  solenne  illud  canticum,  Celebrate  Iehovam,  quia  in  saeculum  misericordia  eius.  Deinde  adiungit,  Adducentium  laudem  in  domum  Iehovae,  quoniam  reducam  captivitatem  terrae.  Adiungit  hostias,  quia  cultus  legalis  postulabat  ut  hoc  quoque  testimonium  gratitudinis  accederet.  Deus  quidem  non  opus  habuit  victimis,  neque  etiam  oblectatus  est  externa  illa  pompa:  sed  rudi  populo  et  adhuc  elementario  haec  pietatis  exercitia  necessaria  erant.  Propheta  igitur  hic  loquitur  pro  temporis  sui  ratione,  quum  adiungit  victimas  laudibus  et  gratiarum  actioni.  Interea  ostendit  in  quem  finem  Deus  sibi  tunc  vellet  hostias  offerri,  ne  Iudaei  putarent  Deum  placari  quum