32:60  perseveranter  intentus  esset.  Damnatur  autem  hac  voce  in  principibus  segnities,  ubi  improbos  videntes  audacter  ad  peccandum  ruere/  vel  metu  vel  indulgentia  diem  de  die  trahunt.  Meminerint  ergo  reges  et  magistratus  so  gladio  armatos  esse,  ut  Dei  iudicia  strenue  et  mature  exsequantur.  Non  potuit  quidem  David  purgare  omnibus  inquinamentis  terram,  quantumvis  animose  in  eam  rem  incumberet:  sed  tantum  promittit  se  absque  ullius  personae  respectu  severum  fore  iudicem  ad  tollendos  omnes  impios.  Iudicibus  autem  saepe  obstat  timiditas,  ne  satis  viriliter  malos  protervientes  compescant.  Quare  necesse  est  esse  praeditos  spiritu  invictae  magnitudinis,  ut  freti  Dei  auxilio  munus  sibi  iniunctum  peragant.  Deinde  ambitio  et  gratia  flexibiles  eos  reddit,  ne  aequabili  tenore  scelera  ubi  oportet  puniant.  Hinc  colligimus  quantopere  placeat  Deo  severitas  quae  modum  non  excedit:  et  quam  rursus  non  probetur  crudelis  humanitas  quae  improbis  habenas  laxat:  sicuti  nulla  est  maior  peccandi  illecebra  quam  impunitas.  Ideo  tenendum  illud  Solomonis,  Prov.  17,  15  :  Qui  iustificat  impium  et  condemnat  innocentem,  uterque  abominatio  est  Deo.  Emphaticum  etiam  est  quod  addit,  ut  noxios  exterminem  e  civitate  Dei.  Nam  si  profanis  etiam  regibus  communiter  mandata  est  scelerum  vindicta,  sciebat  David  sanctiori  vinculo  se  adstringi,  quum  ecclesiae  Dei  praeesset.  Et  certe  qui  tam  honorificum  loeuin  obtinent,  nisi  conatus  omnes  suos  conferant  ad  purgandas  sordes,  quantum  in  se  est  polluunt  Dei  sacrarium:  nec  solum  erga  homines  infideliter  se  gerunt,  bonorum  salutem  prodendo,  sed  etiam  in  Deum  ipsum  sunt  sacrilegi.  Iam  quum  regnum  Davidis  obscura  tantum  fuerit  regni  Christi  imago,  statuendus  nobis  est  in  medio  Christus,  qui  etsi  patitur  multos  hypocritas,  quoniam  tamen  futurus  est  mundi  iudex,  vocabit  tandem  omnes  ad  rationem,  et  segregabit  agnos  ab  hoedis.  Quod  si  videtur  longiorem  moram  facere,  cogitandum  nobis  est  de  aurora  illa  quae  repente  exsurget,  ut  sordibus  purgatis  vera  puritas  refulgeat.  PSALMUS  CII.  ARG.  Videtur  haec  precatio  fuisse  dictata  fidelibus  quum  ia  exsilio  babylonico  languerent.  Primum  autem  moesti  et  supplices  de  suis  afflictionibus  queruntur.  Deinde  urbis  sanctae  et  templi  restitutionem  Deo  commendant.  Et  quo  maiore  fiducia  concipiant  suas  preces,  promissiones  Dei  commemorant  de  felici  tam  regni  quam  sacerdotii  renovatione:  nec  tantum  liberationem  sibi  promittunt  ab  exsilio,  sed  etiam  precantur  ut  Deus  reges  et  populos  sub  obsequium  suum  cogat.  Tandem  interposita  rursus  brevi  querimonia  de  tristi  et  afflicto  suo  statu,  solatium  petunt  ex  Dei  aeternitate:  quia  servos  suos  in  spem  meliorem  adoptans,  a  communi  hominum  sorte  segregavit.