28:60  enseigner  comme  nous  avons  a  vivre,  que  nous  profitions  en  son  eschole,  et  que  nous  venions  de  nostre  bon  gre,  et  que  mesmes  nous  facions  ce  qui  est  dit  au  Pseaume:  c'est  que  pour  estre  bons  gendarmes  de  nostre  Seigneur  Iesus  Christ,  nous  venions  de  nostre  bon  gre,  sans  force,  sans  menace,  que  nous  venions  d'une  affection  franche  et  liberalle  dire:  Seigneur,  me  voici,  ie  m'offre  a  toy.  Quand  donc  nous  souffrirons  d'estre  ainsi  gouvernez  de  Dieu,  et  que  selon  qu'il  remuera  la  bride,  nous  irons,  et  plierons  sous  luy,  que  nous  ne  serons  point  revesches  en  facon  que  ce  soit,  et  que  nous  ne  regimberons  point  a  l'encontre  de  luy  comme  bestes  sauvages.  Voila  (di-ie)  ce  que  nous  avons  a  retenir.  Mais  cependant  que  nous  serons  menez  d'une  crainte  servile,  il  est  certain  que  Dieu  n'acceptera  rien  de  tout  ce  que  nous  ferons:  ie  ne  di  pas  seulement  quand  pour  crainte  des  hommes  et  des  iuges  terriens  nous  ferons  ce  qui  nous  est  commande,  et  nous  abstiendrons  du  mal  qui  nous  est  defendu  :  mais  que  nous  n'observerons  point  la  Loy  de  Dieu  sinon  pource  que  nous  craignons  d'estre  damnez:  encores  un  tel  service  est  reprouve  de  luy,  et  n'en  tiendra  conte.  La  raison?  C'est  qu'U  veut  estre  honore  de  nous,  comme  un  pere  sera  honore  de  ses  enfans.  Car  ie  vous  prie,  si  un  enfant  grince  les  dents  contre  son  pere,  et  qu'il  se  fasche  de  luy  obeir:  mais  pource  qu'il  ne  peut  eschapper  ses  mains,  qu'il  face  ce  qui  luy  est  commande  :  cependant  s'il  luy  estoit  possible,  qu'il  s'en  fuist  de  la  maison,  ou  qu'il  n'obeist  point  a  son  pere:  y  aura-il  occasion  de  se  contenter  en  cela?  Il  est  certain  que  non.  Or  Dieu  veut��il  avoir  moins  pour  luy,  que  les  hommes  mortels,  qui  ne  sont  que  pourriture,  en  demandent?  Or  est-il  ainsi  que  ceux  qui  servent  a  Dieu  par  contrainte,  s'il  leur  estoit  possible,  ils  le  voudroyent  avoir  arrache  du  ciel.  Et  ainsi  advisons,  pour  rendre  a  Dieu  un  service  agreable,  que  nous  luy  facions  sacrifice  de  nos  personnes,  et  en  nos  pensees,  et  en  nos  volontez  et  affections,  et  en  tout  ce  qu'il  y  a:  que  cela  luy  soit  dedie  d'une  affection  pure,  et  d'une  droite  liberalite  (comme  nous  avons  dit).  Il  est  vray  que  nous  devons  bien  craindre  les  punitions,  pource  que  nous  sommes  semblables  a  un  asne  qu'il  faut  tousiours  picquer,  et  avoir  le  baston  dessus.  Et  bien  humilions-nous,  voyans  les  menaces  qui  nous  sont  faites  en  l'Escriture  saincte.  Mais  cependant  passons  plus  outre,  c'est  assavoir  que  nous  cognoissions  Dieu  estre  nostre  pere,  et  le  cognoissans  tel,  que  nous  venions  a  luy  comme  vrais  enfans,  ainsi  qu'il  le  demande  par  son  Prophete:  Si  ie  suis  pere,  ou  est  l'honneur?  Il  ne  dit  pas  seulement:  Si  ie  suis  maistre,  ou  est  la  crainte  que  vous  me  devez?  Mais  il  met  tous  les  deux:  Si  ie  suis  maistre,  ou  est  la  crainte  ?  Et  si  ie  suis  pere,