15:60  gogam  appellant,  boni  sancti  veri  aut  puri  prodire  posse,  quum  nullam  sancti  spiritus  scintillam  prorsus  haberet,  sed  satanico  spiritu  in  omnibus  et  per  omnia  manifestissime  regeretur.  Mox  ubi  ad  caput  ventum  est  et  Deus  spiritum  Danielis  excitavit  qui  seniorum  errores  et  peccata  corrigeret,  qui  veternum  e  mentibus  excuteret,  docens  eos  in  cognitione  veri  Dei  et  filii  eius  Iesu  Christi  negligenter  versatos,  cum  papistis  graviter  hallucinatos  longeque  de  veritatis  semita  fuisse  digressos,  bone  Deus,  qui  rumores,  qui  tumultus,  quae  incendia!  Confestim  haeresiarcharn  exclamarunt,  in  necem  coniurarunt,  insidias  et  laqueos  tetenderunt,  miris  modis  pauperculum  persequentes,  tandem  in  eorum  manum  delapsum  vivum  et  clamantem  Iesum  Dei  filium  flammis  ardentibus  consumpserunt,  asserentes  papistas  in  hoc  articulo  bene  sensisse  et  veritatem  docuisse,  seque  cum  illis  in  hac  re  probe  convenire.  En  quam  repentina  vocis  mutatio:  Antichristi  ecclesia  de  trinitate  optime  sentit,  nec  non  et  de  haereticis  comburendis.  Quemadmodum  igitur  in  trinitatis  articulo  unanimes  convenerunt,  sic  etiam  in  flammarum  supplicio  haereticis  adhibendo  concordes  fuerunt,  nisi  quod  evangelici  aliquanto  mitiores,  qui  non  haereticum  ut  papistae  prius  laqueo  praefocant  quam  ignem  admoveant,  sed  vivum  flammis  exstinguunt,  Perilli  et  Phalaridis  exemplum  non  modo  aequantes  sed  longe  etiam  superantes.  Haec  est  illorum  christiana  pietas,  evangelica  caritas  et  religiosa  professio.  Domini  Iesu  Christi  humilitatem,  patientiam,  benignitatem,  longanimitatem  et  misericordiam  scilicet  imitantes  satis  potuit  infallibilis  veritas  et  magister  optimus  admonere  et  exclamare:  Discite  a  me  quia  mitis  sum  et  humilis  corde.  Discite  quid  est:  misericordiam  volo  non  sacrificium.  Sinite  zizania  crescere  usque  in  diem  messis,  ne  forte  et  triticum  eruatis.  Si  quis  vos  et  ecclesiam  audire  noluerit,  sit  vobis  tanquam  ethnicus  et  publicanus.  Haereticum  hominem  post  admonitiones  saepe  factas  evitate,  tantum  absit  ut  quemquam  occidatis.  Filius  hominis  non  venit  perdere  quemquam  sed  salvare,  et  Deus  optimus  non  vult  mortem  peccatoris  sed  magis  ut  convertatur  et  vivat.  Diligite  inimicos  vestros,  orate  pro  persequentibus  vos  eisque  bene  facite.  Mihi  vindictam*  et  ego  retribuam.  Si  quis  dixerit:  diligo  Deum,  et  fratrem  suum  oderit,  mendax  est  :  qui  enim  fratrem  suum  quem  vidit*  non  diligit,  Deum  quem  non  vidit*  quomodo  diligere  potest?  Caritas  ex  Deo  est  et  omnis  qui  diligit  ex  Deo  est:  qui  vero  non  diligit  is  Deum  non  novit.  Hae  sunt  Christi  voces,  haec  spiritus  sancti  oracula,  quae  cordibus  vestris  evangelicis  infixa  esse  debuerant,  non  impiorum  dogma  et  ritum  in  proximi  perditionem  amplecti,  non  cum  antichristianis  ad  fidelium  supplicia  convenire.