55:6  6  refellitur.  Ut  enim  alios  locos,  qui  ex  scriptura  citantur,  praeteream:  si  hebraice  scripta  fuisset  epistola,  nulla  in  nomine  testamenti  fuisset  allusio,  in  qua  scriptor  immoratur.  Non  potuit  inquam  ex  alio  fonte  hauriri  quod  de  iure  testamenti  capite  nono  disputat,  quam  ex  graeca  voce.  Nam  ^ca^xvj  ambiguam  apud  Graecos  significationem  habet.  rP*D  autem  Hebraeis  non  nisi  foedus  significat.  Haec  una  ratio  sani  iudicii  hominibus  sufficiet  ad  probandum  quod  dixi,  graeco  sermone  scriptam  fuisse  epistolam.  Quod  autem  obiicitur  ex  adverso,  probabilius  esse  Iudaeis  nonnisi  sua  lingua  apostolum  scripsisse,  nihilo  plus  habet  ponderis.  Quotus  enim  quisque  tunc  fuit  qui  avitam  linguam  intelligeret?  quam  quisque  regionem  incolebat,  eius  idioma  didicerat.  Porro  lingua  graeca  latius  patebat  quam  aliae  omnes.  Iam  venio  ad  argumentum.  Principio,  non  hic  est  status  causae,  ut  Iesum  filium  Mariae  Iudaeis  persuadeat  esse  Christum  et  redemptorem  illis  promissum.  Quia  enim  ad  eos  scribit  qui  iam  Christo  nomen  dederant,  caput  illud  pro  confesso  sumit.  Sed  in  hoc  cardine  versatur,  ut  probet  quale  sit  officium  Christi  :  unde  pateat,  eius  adventu  finem  esse  caeremoniis  impositum.  Hanc  distinctionem  notare  operae  pretium  est.  Nam  sicuti  apostolo  supervacuus  fuisset  labor,  hunc  esse  Christum  qui  exhibitus  fuerat,  apud  eos  probare  qui  iam  ita  persuasi  erant:  sic  eos  doceri  qualis  esset  oportuit,  quia  finem,  vim  et  fructum  adventus  eius  nondum  tenebant,  sed  falsa  legis  interpretatione  occupati,  umbram  prehensabant  pro  corpore.  Eiusmodi  hodie  negotium  nobis  est  cum  papistis.  Nobiscum  enim  fatentur  Christum  esse  filium  Dei,  qui  redemptor  mundo  promissus  fuerat:  sed  quam  ad  rem  ventum  est,  eum  plusquam  dimidia  virtutis  suae  parte  nudant.  Orditur  autem  a  Christi  dignitate:  quia  Iudaeis  absurdum  videbatur,  legem  evangelio  posthaberi.  Ac  primum  quidem  illud  statuit  de  quo  erat  disceptatio,  allatam  a  Christo  doctrinam  primas  tenere,  quia  sit  omnium  prophetiarum  clausula.  Sed