41:6  facta  adierunt  regem)  et  sic  loquuti  sunt  ei:  Dari  rex,  in  aeternum  vive.  7.  Consilium  ceperunt  omnes  satrapae  regni,  proceres  et  praesides  provinciarum,  consiliarii,  et  duces,  ut  statuatur  statutum  regis  (hoc  est,  regium,  vel  a  rege),  et  sanciatur  edictum,  ut  quisquis  petierit  petitionem  ab  ullo  deo  et  homine  usque  ad  dies  triginta  (bos)  praeterquam  a  te,  rex,  proiiciatur  in  speluncam  leonum.  Hoc  consilio  studuerunt  regni  proceres  obruere  sanctum  Dei  prophetam,  nempe  ut  proiectus  in  foveam  leonum  periret,  vel  deficeret  ab  externa  professione  cultus  Dei.  Sciebant  autem  eum  magis  cordatum  esse,  quam  ut  vitam  redimeret  tanta  impietate.  Ergo  putarunt  de  eius  vita  esse  actum.  Videntur  sibi  esse  valde  astuti:  sed  Deus  ex  adverso  occurrit,  et  auxiliatus  est  servo  suo,  quemadmodum  videbimus.  Interea  haec  fuit  plus  quam  detestabilis  malitia,  quod  Danielem  perdere  cupiunt  hoc  praetextu.  Etsi  enim  non  colebant  Deum  Israelis,  sciebant  tamen  pium  et  rectum  esse  prophetae  animum:  deinde  experti  fuerant  Dei  illius  potentiam,  qui  illis  erat  incognitus.  Non  damnabant  igitur  Danielem,  neque  etiam  vitio  poterant  vertere  religionem  quam  colebat.  Ideo  dixi  eos  sic  rapi  odio  hominis  in  istam  crudelitatem,  ut  impingant  adversus  Deum.  Neque  enim  poterat  hoc  eos  latere,  praestandum  esse  cultum  Deo.  Adorabant  ipsi  deos  incognitos,  et  non  audebant  damnare  cultum  Dei  Israelis.  Videmus  ergo  ut  diabolus  ipsos  fascinaverit,  quum  ausi  fuerunt  intendere  hoc  crimen  sancto  prophetae.  Caeterum  qua  occasione  abusi  fuerint  nescitur.  Quidam  divinant  hoc  fuisse  factum,  quod  Darius  non  posset  aequo  animo  ferre  gloriam  generi  sui.  Quum  enim  esset  senex,  alter  autem  esset  in  flore  aetatis,  putabat  se  contemni.  Existimant  igitur  quidam  Darium  ipsum  fuisse  tactum  quadam  arcana  aemulatione  :  et  ita  fuisse  datum  his  proceribus  aditum,  ut  possent  miserum  illum  senem  et  nimis  credulum  fallere,  et  quasi  perstringere  eius  oculos.  Sed  haec  coniectura  non  videtur  mihi  satis  firma.  Neque  etiam  anxie  in  hac  re  laboro:  quia  fieri  potest  ut  inter  novi  huius  regni  exordia  vellent  regi  gratulari,  et  decernerent  aliquid  novum  et  insolitum,  quod  etiam  videmus  saepius  fuisse  ab  adulatoribus  regiis  factum.  Ergo  potuit  hic  senex  in  eo  decipi,  quum  nuper  crevisset  eius  monarchia.  Dominatus  enim  fuerat  Medis  duntaxat  :  pervenerant  Chaldaei,  Assyrii,  et  multae  aliae  gentes  ad  eius  imperium.  Talis  accessio  potuit  ipsum  inebriare  inani  gloria:  et  proceres  etiam  putarunt  sibi  plausibilem  esse  causam,  ut  decernerent  divinum  hunc  honorem.  Haec  igitur  videtur  mihi  ratio  una  posse  sufficere.  Ideo  magis  sollicite  non  inquiro:  quia  amplector  quod  probabile  est,  et  quasi  sponte  nobis  occurrit.  Reliqua  differam  in  crastinum.  5  6