34:6  de  prier  et  invoquer  Dieu,  de  recourir  a  lui.  Au  contraire  si  les  propos  ne  so  u  t  que  pour  agiter  le  cerveau,  et  qu'un  homme  iase  et  qu'il  babille,  et  que  cependant  l'on  n'en  recoiue  nulle  bonne  instruction  pour  appliquer  a  salut:  tout  cela  sont  paroles  de  vent.  Et  ainsi  notons,  quand  nous  voudrons  nous  mesler  d'exhortation  ou  de  doctrine,  que  sur  tout  il  nous  faut  tendre  a  ceste  fermete-la,  c'est  assavoir,  que  ceux  qui  nous  escoutent,  recoivent  quelque  bonne  instruction,  tellement  qu'ils  soyent  accoustumez  a  cheminer  selon  Dieu,  et  qu'ils  soyent  fondez  en  la  fiance  de  sa  misericorde,  qu'ils  s'appliquent  a  l'invoquer,  non  pas  en  doute  ni  en  suspends,  mais  sachans  qu'ils  seront  exaucez.  Voila  donc  comme  il  nous  faut  estudier  a  instruire  nos  prochains  en  telle  fermete,  que  ce  que  nous  avons  apprins  ne  s'escoule  pas  comme  vent.  Et  au  reste  chacun  de  nous  doit  aussi  tendre  a  telle  doctrine,  que  nous  n'appetions  point  d'estre  remplis  de  vent:  comme  nous  voyons  beaucoup  de  curieux,  qui  voudroient  qu'on  s'amusast  apres  eux,  pour  leur  repaistre  leurs  oreilles,  et  pour  satisfaire  a  leurs  vaines  phantasies.  Ils  imaginent  ceci  et  cela,  et  voudroyent  qu'on  s'amusast  a  leur  complaire,  pour  disputer  de  choses  qui  sont  de  nulle  edification.  Et  l'esprit  humain  est  par  trop  enclin  a  ce  vice-la,  et  mesme  y  est  adonne  du  tout.  Car  si  chacun  de  nous  vouloit  suivre  son  appetit,  il  est  certain  qu'il  ne  seroit  question  que  de  nous  tenir  des  propos  inutiles  de  ceci  et  de  cela,  qui  s'espandroyent  en  l'air,  qu'il  n'y  auroit  nulle  fermete,  il  n'y  auroit  que  vent.  Et  ainsi  apprenons  de  cercher  ce  qui  nous  est  bon  et  propre  pour  nous  edifier  en  la  crainte  de  Dieu,  en  la  foy,  et  en  patience,  et  en  toutes  choses  bonnes  et  utiles.  Voila  ce  que  nous  avons  a  retenir  quant  a  ce  passage-la,  ou  Iob  fait  mention  de  paroles  de  vent.  Vrai  est  que  cependant  il  nous  faut  aussi  regarder  a��  nous,  que  nous  ne  reiettions  pas  tous  propos  qu'on  nous  tiendra,  comme  s'ils  estoient  de  vent:  mais  que  nous  apprenions  a  gouster  s'il  y  a  quelque  vanite,  ou  instruction  bonne:  que  nous  cognoissions  cela  pour  l'appliquer  a  nostre  usage.  Et  puis  prions  Dieu  qu'il  nous  face  la  grace,  quand  on  nous  presentera  quelque  bonne  doctrine,  qu'elle  ne  s'escoule  point  par  nostre  nonchalance,  que  cela  ne  s'en  aille  point  au  vent.  Car  quand  on  nous  viendra  proposer  la  parole  de  Dieu,  il  faut  que  nous  sachions  que  la  il  y  a  tousiours  quelque  instruction  bonne.  Or  beaucoup  n'y  profitent  gueres.  Et  pourquoy?  Car  ils  n'y  appliquent  point  tous  leurs  sens  et  leurs  esprits,  ils  voltigent  cependant  de  coste  et  d'autre,  et  la  parole  de  Dieu  s'en  va  comme  en  vent:  mais  c'est  d'autant  qu'il  n'y  a  point  de  bonne  fermete  en  eux.  Toutes  fois  pour  bien  appliquer  ceste  sentence  a  nostre  usage,  il  faut  1*