25:6  6  ut  percutiat  plaga  animae  sanguinem  innocentem:  et  dicet  universus  populus,  Amen.  26.  Maledictus  qui  non  stabilierit  verba  legis  istius  faciendo  illa:  et  dicet  universus  populus,  Amen.  Iam  ad  clausulam  legis  exponendae  ventum  est,  ubi  tractandae  sunt  eius  sanctiones,  tam  a  promissionibus  quam  a  minis  sumptae.  Quamvis  enim  iure  suo  praecise  exigere  possit  Deus  quod  visum  est:  quae  tamen  eius  est  erga  homines  indulgentia,  eos  ad  libenter  parendum  allicere  promissionibus  voluit.  Ergo  quia  naturaliter  spe  mercedis  ducimur,  ignavi  ac  lenti  sumus,  donec  fructus  appareat.  Sponte  itaque  Deus,  ad  excutiendam  pigritiem,  promittit,  si  legi  suae  obediant  homines,  se  remuneratorem  fore.  Iam  haec  non  vulgaris  est  liberalitas,  quod  oblata  mercede  pacisci  mavult  quam  pro  imperio  simpliciter  iubere.  Tenenda  est  enim  Christi  sententia,  ubi  totam  legem  impleverimus,  nihil  nos  promereri  (Luc.  17.  10):  quia  Deus  nostra  omnia  obsequia  sibi  vendicat.  Utcunque  ergo  supra  vires  conemur,  studiaque  omnia  conferamus  ad  servandam  legem:  Deus  tamen  non  ideo  nobis  obstringetur,  nisi  quatenus  ultro  contraxit,  seque  voluntarium  fecit  debitorem.  Et  hoc  etiam  a  vulgaribus  theologis  animadversum  fuit,  mercedem  non  ex  operum  dignitate  vel  merito  pendere,  sed  ex  pacto.  Quanquam,  ut  paulo  post  videbimus,  ne  tantillum  quidem  nos  iuvaret  eiusmodi  promissio,  si  Deus  singulis  mercedem  rependeret  secundum  opera:  verum  quia  hic  defectus  adventitius  est,  refulget  nihilominus  in  eo  singularis  Dei  humanitas,  quod  proposita  spe  vitae  aeternae,  nos  ad  obsequium  animare  dignatus  est.  Ideoque  per  Ezechielem  (20,  21)  Israelitis  ingratitudinem  exprobrat,  quod  praecepta  sua  bona  contempserint,  de  quibus  dictum  erat:  Qui  fecerit  haec  vivet  in  ipsis.  Nunc  videmus  ut  promissionibus  sancita  fuerit  legis  autoritas.  Verum  quia  non  pigri  modo,  sed  etiam  refractarii  sumus,  ex  opposito  minas  adiecit  quae  terrorem  incuterent,  tum  ad  sub-  1*