9:599  599  RESPONSE  600  Or  les  lecteurs  ont  a  noter  que  sainct  Paul  parle  la  de  la  Circoncision,  comme  estant  desia  mise  bas  et  hors  d'usage:  bref,  comme  estant  une  marque  pour  separer  les  Iuifs  d'avec  les  Payens.  Ce  brouillon  met  en  mesme  rang  le  Baptesme,  qui  est  pour  unir  les  deux  ensemble,  et  ratifier  telle  union.  Il  dit  que  la  Cene  n'est  rien  non  plus.  D'adorer  Dieu  avec  reverence  exterieure,  de  faire  confession  de  sa  foy:  tout  cela  n'est  rien,  si  on  le  veut  croire.  Que  faut-il  plus  longuement  insister  a  rembarrer  tels  blasphemes?  Mais  les  mots  de  sainct  Paul  portent:  Qu'il  n'y  a  que  la  foy  besongnante  par  charite  (Gal.  5,  6).  Ouy  bien.  Mais  il  faut  noter  que  sainct  Paul  met  ces  choses  comme  inseparables,  Croire  de  coeur,  et  confesser  de  bouche  (Rom.  10,  10).  Et  aussi  la  foy  est  celle  qui  nous  enseigne  d'adorer  un  seul  Dieu,  et  nous  eslongner  de  toute  idolatrie.  Au  reste,  ie  demande  a  cest  habile  docteur,  Comment  maintenant  il  met  la  foy  en  premier  degre,  veu  que  ci  dessus  il  n'en  faisoit  nul  conte,  et  que  la  seule  dilection  luy  suffisoit.  Qui  est-ce  qui  ne  void  qu'il  y  a  ici  contredit  trop  notoire?  Il  vient  puis  apres  a  l'exemple  de  sainct  Paul,  lequel  s'est  sanctifie  pour  offrir  son  voeu  au  temple  de  Ierusalem  (Act.  21,  26).  Ii  dit  que  si  ie  condamne  un  homme  d'hypocrisie  pour  plier  le  genouil  devant  une  [page  27]  idole,  sainct  Paul  seroit  plus  coulpable.  Vous  diriez  qu'il  s'est  persuade  de  mener  des  bestes  par  le  nez.  Pour  le  moins  il  gazouille,  comme  si  iamais  ie  n'eusse  donne  solution  a  cest  argument:  et  le  manie,  comme  s'il  avoit  privilege  de  falsifier  a  sa  poste  la  verite  toute  patente,  iusqu'a  convertir  le  blanc  en  noir.  Il  presuppose  que  les  Apostres  qui  ont  conseille  a  sainct  Paul  de  ce  faire,  n'ont  pas  seulement  pretendu  d'oster  le  scandale  qui  pouvoit  advenir,  si  sainct  Paul  fust  entre  au  temple  sans  estre  purifie:  c'est  afin  que  sainct  Paul  cachast  sa  doctrine,  et  fist  semblant  d'enseigner  ce  qu'il  n'enseignoit  point.  Desia  c'est  un  trop  vilain  outrage  qu'il  fait  au  serviteur  de  Dieu,  de  le  faire  double  et  feint:  comme  s'il  eust  prins  un  masque  pour  se  desguiser  et  iouer  une  farce.  Or  sainct  Paul  monstre  bien  ailleurs  combien  il  a  este  loin  d'une  telle  feintise,  en  disant  que  sainct  Pierre  a  mal  fait  de  s'estre  retire  de  la  compagnie  des  Payens,  pour  crainte  d'offenser  les  Iuifs  (Gal.  2,  ll).  Il  n'est  pas  ici  question  de  la  spiritualite  fantastique  que  ce  brouillon  nous  forge,  seulement  il  est  dit,  que  Pierre  de  peur  de  fascher  les  Iuifs,  n'osoit  point  manger  avec  les  Payens.  Qu'est  ce  que  sainct  Paul  en  prononce?  Qu'il  l'a  iustement  reprins,  pour  ce  qu'il  ne  cheminoit  point  d'un  droit  pied  en  la  verite  de  l'Evangile.  Et  notamment  le  charge  d'hypocrisie.  Comment  cela  se  peut-il  accorder,  que  sainct  Paul  ait  reprouve  comme  hypocrites  ceux  qui  usoyent  de  quelques  ceremonies  externes,  et  toutefois