49:599  599  SERMONS  600  histoire,  nous  le  devons  aussi  bien  sentir  tous  les  iours.  Nostre  Seigneur  monstre  que  c'est  son  office  de  tirer  la  clarte  des  tenebres.  Quand  donc  nous  l'avons  offense,  aulieu  que  nous  meritons  qu'il  nous  reiette,  il  prendra  occasion  de  la  de  nous  bien  faire,  tellement  que  nos  pechez  mesmes  nous  serons  profitables  :  non  point  de  leur  nature,  mais  (comme  i'ay  desia  dit)  il  convertit  les  tenebres  en  clarte  en  ce  faisant.  Et  ainsi  apprenons  quand  Dieu  use  envers  nous  de  ceste  liberalite  paternelle  que  non  seulement  il  ha  le  soin  de  nos  corps  pour  les  nourrir  et  leur  donner  pasture,  mais  qu'il  nous  esleve  plus  haut,  qu'il  nous  attire  a  soy,  qu'il  se  unit  a  nous  par  le  moyen  de  son  Fils  unique.  Quand  nous  avons  cela,  il  n'ha  point  esgard  a  nos  merites,  comme  si  nous  l'incitions  a  ce  faire:  mais  plustost  il  bataille  contre  nos  pechez,  et  monstre  que  sa  bonte  est  si  grande,  qu'encores  que  nous  le  provoquions  en  toutes  sortes  pour  nous  ruiner,  il  ne  laisse  point  de  prendre  occasion  de  cela  de  nous  eslargir  de  ses  graces:  voire  qui  seroyent  pour  nous  eslever  par  dessus  tout  le  monde  et  pour  nous  attirer  iusques  au  Royaume  des  cieux.  Magnifions  donc  la  bonte  de  nostre  Dieu,  tant  aux  Sacremens,  qu'en  toutes  les  choses  qui  appartiennent  a  nostre  salut.  Mais  OD  pourroit  ici  faire  une  question,  comment  sainct  Paul  dit  que  ceux  qui  ont  este  reiettez  de  Dieu  ont  mange  une  viande  spirituelle.  Car  ce  sont  choses  incompatibles,  que  nous  soyons  participans  de  Iesus  Christ,  qui  est  la  vie  du  monde,  et  que  cependant  nous  perissions  et  soyons  reiettez  de  Dieu.  Davantage  nous  scavons  qu'en  Iesus  Christ  habite  toute  plenitude  de  divinite  en  substance.  Comment  donc  i  serons  nous  alienez  de  Dieu  quand  nous  participerons  a  luy?  Mais  ceste  question  sera  facilement  solue,  moyennant  que  nous  rapportions  la  facon  de  parler  a  ce  que  sainct  Paul  a  voulu  monstrer  :  c'est  a  scavoir  ce  que  le  Sacrement  en  soy  estoit  spirituel,  encores  que  les  hommes  n'en  receussent  point  le  fruit.  Comme  quoy?  Auiourd'huy  le  Baptesme  nous  est  un  signe  spirituel  de  nostre  purgation:  il  nous  signifie  (comme  nous  avons  dit)  nostre  lavement,  et  comme  nous  sommes  faits  nouvelles  creatures,  que  nous  avons  le  sainct  Esprit,  qui  est  la  marque  pour  nous  asseurer  que  Dieu  nous  advoue  pour  ses  enfans.  Or  maintenant  si  le  Baptesme  est  donne  a  des  enfans,  qui  estans  venus  en  aage  soyent  pervers  et  malins,  et  se  destournent  de  Dieu,  et  se  desbauchent  pleinement,  ie  Baptesme  aura-il  change  de  nature  ou  de  vertu  pour  cela?  Nenni.  Quand  nous  venons  a  la  Cene,  voyla  Iesus  Christ  qui  nous  testifie  que  nous  sommes  unis  a  son  corps,  et  que  c'est  vrayement  nostre  viande,  que  son  sang  est  nostre  breuvage.  Or  il  viendra  des  hypocrites  qui  se  mocqueront  pleine-