40:596  regis  somnium  ubique  celebre  fuit,  et  tamen  nemo  fere  profecit,  quantum  attinet  ad  regnum  aeternum  Christi.  Atqui  hoc  praecipuum  erat  caput  in  hoc  somnio,  ut  postea  videbimus.  Sed  Deus  inprimis  voluit  consulere  suis  eiectis,  ne  desponderent  animos  inter  illas  revolutiones,  ut  loquuntur,  quae  poterant  videri  contrariae  tot  vaticiniis,  quibus  promissa  fuerat  non  simplex  liberatio,  sed  etiam  felicitas  perpetua  et  continua  sub  manu  Dei.  Tenemus  igitur  nunc  finem,  quem  Deus  in  hoc  somnio  spectavit.  Nunc  expositio  nobis  tractanda  est.  Attigimus  quidem  aliquas  eius  partes:  sed  Daniel  ipse  nobis  aperiet  viam  ut  ultra  progrediamur.  Primum  dicit,  36.  Hoc  est  somnium:  et  interpretationem  eius  dicemus  coram  rege.  37.  Tu  rex,  rex  regum  (es),  cui  Deus  coelorum  regnum,  potentiam  et  robur  dedit  (Alii  transferunt  per  adiectiva  nomina,  vel  per  epitheta,  regnum  forte  et  robustum  dedit),  et  gloriam  tibi  (istud  "j2?  Lach,  est  supervacuum).  38.  Et  ubicunque  habitant  filii  hominum,  bestia  agri,  et  volucris  coelorum  (id  est,  volucres:  est  enallage  numeri),  dedit  in  manum  tuam,  et  praefecit  te  omnibus  (ad  verbum,  dominari  te  fecit  in  omnibus  ipsis),  tu  ipse  caput  (es)  aureum.  Daniel  hic  declarat  aureum  caput  statuae  esse  regnum  babylonicum.  Scimus  dominatos  fuisse  Assyrios  antequam  monarchia  translata  esset  Babylonem.  Sed  quoniam  non  ita  praevaluerant,  ut  possent  censeri  monarchae  in  plaga  illa  orientali,  ideo  hic  primo  loco  ponitur  imperium  babylonicum.  Deinde  hoc  etiam  notare  operae  pretium  est,  Deum  noluisse  hic  referre  quid  iam  ante  contigisset:  sed  potius  hoc  fuisse  ei  propositum,  ut  populus  in  futurum  penderet  ab  hoc  vaticinio,  et  etiam  in  ipsum  recumberet.  Ideo  supervacuum  fuit  narrare  quidquam  de  Assyriis,  quoniam  imperium  illud  iam  collapsum  erat,  Atqui  Chaldaei  dominaturi  erant  adhuc  ad  tempus  aliquod,  nempe  circiter  annos  septuaginta,  vel  sexaginta  ut  minimum.  Ideo  voluit  Deus  suspensos  tenere  animos  servorum  suorum  usque  ad  finem  illius  monarchiae:  deinde  erigere  spe  nova,  usquedum  secunda  monarchia  difflueret:  ut  postea  etiam  patienter  quiescerent  sub  tertia  et  quarta  monarchia,  et  tandem  scirent  maturum  esse  tempus  adventus  Christi.  Haec  ratio  est  cur  Daniel  hic  statuat  in  primo  ordine  et  gradu  monarchiam  chaldaicam.  Et  in  hac  re  nihil  est  difficultatis,  quia  dicit  regem  Nebuchadnezer  esse  caput  aureum  statuae.  Cur  autem  vocetur  caput  aureum,  colligere  licet  ex  proximo  contextu:  nempe  quia  maior  fuit  tunc  integritas,  quam  sub  imperio  Persarum  et  Medorum.  Verum  quidem  est,  fuisse  saevissimos  latrones  Chaldaeos:  scimus  etiam  quam  detestabilis