32:596  celuy  qui  a  desia  obtenu  son  desir.  Et  pourquoy?  Car  Dieu  est  egal  envers  tous  ceux  qui  l'invoquent  sans  feintise.  Il  ne  dit  pas  qu'il  fera  bien  a  l'un,  et  qu'il  reiettera  l'autre:  mais  nous  avons  la  promesse  generale,  laquelle  s'estend  a  tous  sans  exception  :  c'est  ascavoir,  que  si  nous  avons  nostre  refuge  a  luy  en  verite,  qu'il  sera  tout  prest  a  nous  recevoir:  que  mesmes,  devant  que  nous  ayons  la  bouche  ouverte,  il  aura  la  main  estendue  pour  nous  donner  tout  ce  qu'il  scait  estre  bon  et  utile  pour  nostre  salut.  Puis  qu'ainsi  est  donc  que  ceste  promesse  est  generale,  ei  nous  ne  sommes  par  trop  ingrats,  il  nous  faut  confier  que  Dieu  nous  exaucera  aussi  bien  que  ceux  lesquels  vous  voyons  desia  avoir  este  exaucez  auparavant:  et  faut  que  nous  prenions  leur  exemple  pour  autant  de  confirmation  des  promesses  que  Dieu  nous  donne.  Voyla  pourquoy  David  dit,  Que  ceux  qui  craignent  Dieu,  le  verront,  et  en  le  voyant  s'esiouiront:  et  mesme,  il  nous  faut  bien  noter  le  mot  qu'il  adiouste,  Car  i'espere  en  tes  commandemens.  Comme  s'il  disoit,  Ils  ne  trouveront  rien  en  moy  pourquoy  tu  te  sois  monstre  si  benin  et  si  liberal,  quand  tu  m'as  enseigne  par  ton  sainct  Esprit,  sinon  d'autant  que  ie  me  suis  confie  en  ta  parole.  Or  ta  parole  est  commune  a  tous  ceux  qui  te  craignent.  Ainsi  donc,  ils  scauront  que  ce  que  tu  as  fait  en  ma  personne,  leur  appartient,  et  le  peuvent  appliquer  a  leur  usage.  Cecy  est  pour  mieux  confermer  ce  que  i'ay  desia  dit:  ascavoir,  que  si  Dieu  a  traitte  humainement  quelcun  de  nos  prochains,  qu'il  ait  eu  pitie  de  luy:  nous  avons  a  conclurre,  que  nous  le  sentirons  semblable  envers  nous.  Et  pourquoy?  Car  nous  avons  sa  parole,  laquelle  est  veritable,  elle  ne  nous  peut  point  frustrer.  Esperons  donc  en  luy,  et  nous  sentirons  le  pareil  de  ce  que  nous  voyons  en  ceux  qui  nous  ont  monstre  le  chemin,  et  nous  ont  donne  l'exemple  de  nous  reposer  sur  la  bonte  de  Dieu,  ayans  les  promesses  qu'il  nons  offre.  Voyla  ce  qu'a  entendu  David  en  ce  verset.  Or  il  adiouste,  Seigneur,  i9ay  cognu  que  tes  iugemens  sont  iustes,  et  que  tu  m'as  afflige  en  verite,  c'est  a  dire,  en  droiture.  David  semble  bien  dire  yci  une  chose  vulgaire,  qu'il  cognoist  que  les  Statuts  de  Dieu  sont  iustes.  Car  qui  est  celuy  qui  soit  si  mal-heureux  qui  ne  le  confesse?  Mesme  ceux  qui  oseront  blasphemer  contre  Dieu,  quand  on  les  pressera,  diront  bien,  que  l'Escriture  saincte  est  une  doctrine  a  laquelle  il  n'y  a  que  redire,  que  la  Loy  de  Dieu  est  la  regle  de  toute  equite.  Les  meschans  donc  diront  bien  cela:  mais  cependant  il  y  en  a  bien  peu  qui  ayent  ceste  consideration  bien  imprimee  en  leurs  coeurs,  c'est  ascavoir  d'estimer  la  Loy  de  Dieu  iusques  la  de  dire  que  tout  ce  qui  est  contenu  en  icelle,  est  iuste.  Pourquoy?  cela  vient  en  premier  lieu,  de  la  contrariete  de