9:594  peres  et  docteurs  de  l'Eglise  qui  ont  combatu  contre  les  oeuvres  de  ce  mal-heureux-la.  Mais  il  faut  que  le  proverbe  ancien  soit  verifie,  assavoir,  qu'il  n'y  a  hardiesse  telle  que  des  ignorans.  Iamais  il  n'a  leu  un  fueillet  de  tous  les  Docteurs  anciens.  Cependant  par  une  calomnie  supposee  il  voudroit  faire  a  croire  qu'il  est  grand  suppost  de  la  Foy  catholique.  Mais  desia  il  a  este  assez  monstre,  que  nous  n'avons  rien  de  semblable  a  ceux  qui  ont  voulu  iudaizer.  Il  dit  quand  et  quand  que  ie  veux  estre  tenu  primat  de  l'Eglise.  Mais  qu'est  ce  qui  le  meut  a  parler  ainsi,  sinon  qu'il  creve  d'envie,  de  ce  qu'il  plaist  a  Dieu  que  ie  soye  en  reputation?  C'est  la  vraye  source  de  son  zele.  Il  poursuit  plus  outre,  disant  que  ie  fay  comme  les  Scribes  et  Pharisiens,  mettant  des  fardeaux  importables  sur  les  espaules  d'autruy,  que  ie  ne  voudroye  point  toucher  du  petit  doigt.  Mais  premierement  qu'il  prouve  que  ie  m'exempte  de  la  loy  que  i'ordonne  aux  autres.  En  quoy  il  se  trouvera  menteur  plus  qu'efironte.  Apres  il  faut  iuger,  si  de  protester  qu'on  adore  un  seul  Dieu,  c'est  un  fardeau  importable.  Comme  i'ay  touche  ci  dessus,  ie  laisse  les  ombres  de  la  Loy:  parquoy  il  me  reproche  [page  18]  faussement,  que  ie  cherche  des  fables  Iudaiques  en  laissant  les  exemples  du  nouveau  Testament.  Car  ie  ne  parle  que  du  service  exterieur  de  Dieu,  tel  que  Iesus  Christ  l'a  establi  tant  de  bouche  que  de  fait.  Mais  luy-mesme  se  coupe  la  gorge  de  son  cousteau,  usant  de  contrariete  trop  lourde,  allegant  que  si  nul  ne  peut  estre  Chrestien  sans  ceremonies  externes,  ie  doy  donc  imiter  l'Eglise  primitive,  en  vendant  mes  possessions  pour  distribuer  aux  povres.  A  quoy  la  response  est  facile:  c'est  qu'il  vienne,  et  ie  luy  passeray  procuration  de  vendre  tout  ce  que  ie  possede  au  monde,  et  d'en  faire  aumosnes.  Mais  de  son  coste  il  monstre  bien  de  quel  esprit  il  est  mene,  desgorgeant  les  moqueries  dont  Iulian  l'apostat  a  iadis  use  pour  mettre  l'Evangile  en  opprobre.  Il  replique,  que  de  mettre  tout  en  commun,  c'estoit  exterieurement  garder  le  precepte  de  charite.  Pour  le  premier  il  monstre  qu'il  est  un  peu  trop  familier  avec  les  Anabaptistes,  desquels  il  s'est  voulu  separer.  Mais  il  considere  mal,  que  si  tous  eussent  vendu  ce  qu'ils  avoyent,  les  plus  riches  eussent  este  contraints  de  mendier:  nul  n'eust  eu  maison  pour  y  habiter,  ne  pour  y  recevoir  les  povres.  Au  reste,  pour  le  faire  court,  toutes  ses  cavillations  peuvent  estre  rabatues  en  un  mot:  assavoir,  que  tous  exemples  nous  doivent  servir  d'instruction,  en  tant  plus  ils  sont  conformes  a  la  reigle  generale,  et  au  commandement  perpetuel  qui  est  donne  a  tous.  Comme  quand  nous  disons,  Qu'il  n'est  licite  pour  eviter  persecution,  de  deroguer  a  l'honneur  de  Dieu,  en  faisant  semblant  de  consentir  [page  19]  a  l'idolatrie:  cela  est  compris  au  com-  38