49:594  la  vertu  et  la  substance:  et  voyla  pourquoy  sainct  Paul  nomme  ici  le  rocher  duquel  sortit  l'eau:  Spirituel:  voire  d'autant  qu'il  estoit  tesmoignage  d'une  chose  haute  et  excellente:  c'est  a  scavoir  qu'il  nous  faut  chercher  toute  nostre  vie  en  Iesus  Christ.  Nous  ne  dirons  pas  que  le  pain  que  nous  mangeons,  et  le  vin  ou  l'eau  que  nous  beuvons  pour  nostre  nourriture,  soyent  choses  spirituelles:  car  elles  sont  destinees  a  un  usage  corruptible:  elles  servent  a  la  vie  de  nos  corps.  Et  ainsi  il  nous  faut  bien  rapporter  ce  titre  que  donne  sainct  Paul  au  rocher,  a  l'usage  auquel  il  a  este  destine:  c'est  a  scavoir  qu'il  fust  figure  de  nostre  Seigneur  Iesus  Christ,  et  non  pas  (comme  nous  avons  dit)  une  figure  vaine,  mais  que  la  substance  et  la  verite  y  fust  aussi.  La  pierre  donc  ou  le  rocher  estoit  Iesus  Christ.  Ce  peuple  la  n'a  pas  este  sauve  par  autre  moyen  que  nous  :  il  a  falu  que  nostre  Seigneur  Iesus  Christ  fust  sa  vie,  d'autant  qu'en  Adam  nous  sommes  tous  morts.  Et  si  nous  cherchons  vie  en  Dieu,  comme  nous  avons  declare  au  sermon  precedent,  il  ne  faut  pas  que  nous  y  allions  par  longs  circuits,  mais  il  nous  faut  venir  a  la  fontaine,  laquelle  nous  est  prochaine:  car  Dieu  ha  la  source  de  vie  en  luy,  mais  elle  nous  est  cachee,  et  nous  n'y  pouvons  parvenir:  or  en  Iesus  Christ  nous  pouvons  puiser  et  boire.  Et  voyla  pourquoy  il  est  dit  par  le  Prophete  Iesaie,  Vous  tous  qui  avez  soif,  venez  aux  eaux:  car  ceste  promesse  la  n'est  point  accomplie  qu'au  regne  de  nostre  Seigneur  Iesus  Christ,  comme  aussi  il  le  monstre  au  septieme  chapitre  de  sainct  Iean,  Qui  ha  soif,  qu'il  viene  a  moy  :  car  i'ay  les  eaux  vives.  Et  ainsi  nottons  bien  que  sainct  Paul  nous  a  ici  declare  que  vrayement  les  Peres  qui  ont  vescu  sous  la  Loy,  ont  este  faits  participans  de  la  vertu  de