48:592  qui  se  veut  avancer  et  mettre  en  oeuvre  avant  que  Dieu  l'y  pousse.  Au  contraire,  quand  Dieu  l'envoye,  il  ne  faut  point  estriver,  mais  dire,  Seigneur  me  voyci,  employe  moy.  Voyla  comment  S.  Luc  monstre  que  les  Apostres  se  sont  rendus  obeissans  a  Iesus  Christ,  quand  il  leur  a  defendu  de  partir  de  Ierusalem,  iusques  a  ce  qu'ils  eussent  receu  la  promesse  de  Dieu.  En  cela  nous  voyons  que  la  grace  du  S.  Esprit  avoit  desia  besongne  en  eux:  car  un  peu  auparavant  les  voyla  esgarez,  ils  laissent  leur  Maistre,  ils  ne  scavent  plus  que  c'est  de  l'assistance  de  Dieu,  et  de  sa  sauvegarde:  ils  se  laissent  dissiper  par  Satan.  Mais  quoy?  quand  Dieu  leur  a  fait  la  grace  d'entendre  sa  voix,  il  n'est  plus  question  sinon  qu'il  leur  face  signe  du  bout  du  doigt,  et  iis  obeissent.  S'il  leur  defend  quelque  chose,  ils  n'attentent  rien:  mais  au  contraire  quand  il  leur  commande  de  marcher,  il  n'y  a  resistance  ne  difficulte  qui  les  retiene.  Ainsi  donc  nous  voyons  qu'il  faut  que  Dieu  besongne  en  nous  pour  en  tirer  une  telle  suietion.  Car  autrement,  quand  il  dira  Retirez-vous,  nous  voudrons  marcher,  et  quand  il  voudra  nous  faire  marcher,  nous  reculerons.  Voyla  comment  nous  sommes  en  nostre  nature.  Nous  en  avons  un  si  beau  miroir  aux  Iuifs.  Car  si  nous  lisons  comme  ils  se  sont  gouvernez,  mesmes  apres  avoir  este  delivrez  d'Egypte,  nous  y  trouverons  une  grande  ingratitude.  Car  quand  Dieu  leur  commande  de  marcher  contre  leurs  ennemis,  et  leur  promet  qu'il  leur  donnera  victoire,  ils  ne  veulent  pas  marcher,  mais  ils  murmurent  contre  Dieu:  voire,  ou  ironsnous?  il  semble  qu'il  nous  veuille  destruire,  et  nous  envoyer  comme  moutons  a  la  tuerie.  Yoyla  leur  rebellion.  Au  contraire,  quand  Dieu  leur  dit:  Ne  bougez:  ils  veulent  marcher,  et  ne  les  peut-on  retenir.  Et  quoy?  disent-ils:  nous  perdons  le  temps,  que  ne  marchons-nous  ?  Voyla  comme  les  hommes  veulent  marcher  quand  Dieu  le  defend,  et  quand  il  dit  Marchez,  il  n'y  a  celuy  qui  veuille  faire  un  pas.  Brief,  il  semble  que  les  hommes  se  veuillent  esvertuer  pour  contredire  a  Dieu.  Yoyla  comme  ils  en  sont.  Leur  hardiesse  est  comme  une  phrenesie:  ils  sont  forts,  comme  un  phrenetique  sera  assez  fort,  voire  pour  se  meurtrir  et  luy  et  les  autres.  Car  quand  Dieu  les  veut  retirer  ils  sont  furieux,  et  veulent  tout  tuer:  et  au  contraire,  quand  Dieu  les  incite  de  marcher,  ils  sont  si  lasches  qu'il  n'y  a  en  eux  une  seule  ongle  qui  se  veuille  remuer.  Et  pourtant  nous  avons  a  prier  Dieu  qu'il  nous  face  la  grace  que  comme  les  Apostres  nous  soyons  arrestez  quand  il  le  commande,  et  que  nous  marchions  quand  il  parle.  Voyla  pourquoy  il  a  ordonne  a  chacun  son  office  et  sa  charge.  Quand  il  a  ordonne  les  familles,  il  a  declare  quelle  authorite  l'homme  avoit  sur  sa