32:592  ascavoir,  Qu'il  luy  a  este  bon  d'estre  afflige.  Combien  donc  que  Dieu  retire  sa  main,  et  qu'au  lieu  de  nous  traitter  doucement  il  nous  rudoje:  au  lieu  de  nous  envoyer  abondance  de  biens,  qu'il  nous  laisse  avoir  faim  et  soif:  au  lieu  de  nous  donner  sante,  il  nous  presse  de  maladies,  que  soyons  pressez  de  beaucoup  d'angoisses,  beaucoup  de  tormens,  tellement  que  nous  ne  scachions  que  devenir:  si  faut-il  tousiours  regarder  a  la  fin,  pour  estre  consolez  avec  David,  en  disant:  Seigneur,  il  m'a  este  bon  d'estre  humilie,  pour  apprendre  tes  statuts.  Or  s'il  a  fallu  que  David  ait  este  afflige,  afin  d'estre  mieux  dispose  a  apprendre  les  ordonnances  de  Dieu,  que  sera-ce  de  nous,  qui  sommes  pleins  de  vanitez  de  ce  monde?  Cognoissons  donc  que  nous  avons  besoin  d'estre  corrigez  de  la  main  de  Dieu,  et  d'estre  tenus  en  bride  courte,  si  nous  voulons  profiter  en  la  doctrine  de  salut.  Voyla  donc  comme  il  nous  faut  prattiquer  ces  admonitions  de  David.  Et  quand  nous  en  ferons  ainsi,  nous  pourrons  dire  pour  conclusion  ce  qu'il  met  au  dernier  verset  :  c'est  ascavoir,  que  la  Loy  de  Dieu  nous  est  plus  precieuse  que  l'or  ou  l'argent.  C'est  ainsi  qu'il  en  faut  faire  pour  priser  la  parole  de  Dieu,  comme  elle  le  merite,  de  ne  nous  point  arrester  aux  choses  de  ce  monde,  mais  de  regarder  tousiours  plus  loin,  ascavoir,  au  ciel.  Quand  donc  nous  avons  fait  ainsi  nostre  profit  des  afflictions  que  Dieu  nous  envoyera,  il  nous  fera  quant  et  quant  la  grace  de  priser  tellement  sa  parole,  que  nous  adhererons  du  tout  a,  icelle.  Et  le  prians  qu'il  nous  despouille  de  toutes  les  cupiditez  et  affections  mauvaises  de  nostre  chair,  nous  ne  demanderons  sinon  qu'il  regne  et  qu'il  vive  en  nous.  Suyvant  ceste  saincte  doctrine,  nousnous  prosternerons  devant  la  face  de  nostre  bon  Dieu,  en  cognoissance  de  nos  fautes.  Le  prians  qu'il  luy  plaise  nous  retirer  des  meschantes  affections  qui  nous  destournent  de  luy,  et  de  son  service:  et  que  nous  oublions  tellement  tout  ce  qui  nous  peut  divertir  du  droit  chemin  de  salut,  que  nous  ne  demandions  sinon  de  parvenir  a  ceste  vie  immortelle  qui  nous  attend  au  ciel.  Qu'il  ne  permette  pas  que  nous  vivions  yci  comme  bestes  brutes,  ne  scachans  pourquoy  nous  sommes  creez  aa  monde:  mais  que  le  recognoissans  nostre  Createur,  nostre  Pere  et  Sauveur,  nous-nous  assuiettissions  a  luy  comme  ses  creatures,  et  luy  obeissions  comme  vrais  enfans,  iusqu'a  ce  qu'il  nous  ait  retirez  de  ce  monde  pour  nous  faire  participans  de  ceste  beatitude  eternelle  et  de  cest  heritage  immortel  qu'il  nous  a  prepare  au  ciel,  et  lequel  il  nous  a  acquis  par  nostre  Seigneur  Iesus  Christ.  Que  non  seulement  il  nous  face  ceste  grace,  mais  aussi  a  tous  peuples  et  nations  de  la  terre,  etc.