9:590  enfans  de  dilection  et  de  l'esprit,  lesquels  sont  ressuscitez  avec  Iesus  Christ,  et  ne  cerchent  plus  les  choses  terrestres,  mais  d'enhaut:  et  de  condamner  en  oeuvres  externes  a  la  facon  des  Iuifs,  ceux  qui  ne  sont  subiets  au  iugement  d'autruy,  a  cause  de  la  liberte  qui  leur  a  este  acquise  :  veu  que  c'est  leur  imposer  sur  le  col  un  ioug  charnel.  Or  il  y  a  ici  un  poinct  a  noter:  c'est  quil  farcit  toutes  les  marges  de  son  livre  de  force  cottations,  comme  s'il  ne  parloit  que  par  la  bouche  des  Apostres.  Il  appelle  nostre  Seigneur  Iesus  Christ  la  dilection  divine,  et  observation  de  la  Loy:  qui  est  une  facon  de  parler  [page  l  l  ]  estrange,  et  non  acoustoumee  en  l'Escriture.  Mais  pour  prouver  ce  qu'il  a  invente,  il  allegue  le  trezieme  des  Romains  (v.  10),  ou  il  est  simplement  dit,  que  celuy  qui  aime  son  prochain,  accomplit  la  Loy.  Il  allegue  aussi  le  troisieme  des  Colossiens,  pour  monstrer  que  les  fideles  ne  doyvent  estre  astreints  a  nulle  ceremonie.  Or  la  sainct  Paul  en  monstrant  que  la  sainctete  des  enfans  de  Dieu  n'est  point  situee  aux  ombres  de  la  Loy,  leur  remonstre  a  quoy  ils  doivent  sur  tout  appliquer  leur  estude.  Or  cela  n'empesche  pas  que  cependant  ils  ne  doivent  honorer  Dieu,  et  de  corps  et  d'ame.  Il  allegue  un  autre  passage  du  second  chapitre  de  la  premiere  aux  Corinthiens,  ou  il  est  dit,  que  l'homme  fidele  iuge  de  tout,  et  n'est  en  rien  iuge  (v.  15).  Or  la  il  n'est  nullement  question  des  ceremonies:  mais  seulement  S.  Paul  reproche  aux  Corinthiens,  qu'a  cause  de  leur  ambition,  leurs  debats,  leurs  sectes,  et  autres  affections  charnelles,  ils  ne  sont  point  capables  des  secrets  spirituels  de  Dieu.  Il  allegue  le  cinquiesme  des  Galatiens,  qu'on  ne  doit  point  mettre  loy  ne  ioug  au  col  de  ceux  qui  sont  menez  de  l'Esprit  de  Dieu  (v.  1).  Voire:  mais  il  faut  regarder  si  Dieu  permet  a  ses  enfans  de  courir  a  travers  champs  a  bride  avallee.  Il  faut  aussi  distinguer  entre  le  ioug  de  Christ,  et  celuy  que  les  hommes  voudroyent  imposer  a  leur  fantasie.  Je  confesse  qu'il  n'y  a  que  Dieu  seul  qui  soit  legislateur  spirituel  sur  nos  ames:  mais  de  la  il  ne  s'ensuit  point  que  nous  ne  luy  devions  rendre  le  service  exterieur,  qui  est  tesmoignage  que  nous  sommes  son  peuple.  Il  allegue  ce  qui  est  contenu  au  huitieme  des  [page  12]  Romains:  Qui  est-ce  qui  accusera  les  esleus  de  Dieu?  C'est  Dieu  qui  les  iustifie  (v.  33).  Or  sainct  Paul  ne  traite  pas  la  des  ceremonies,  ni  des  loix  humaines  mesme:  mais  seulement  declare,  puis  que  Dieu  nous  recoit  a  merci,  que  nous  pouvons  estre  asseurez  de  nostre  salut,  et  par  consequent  despiter  t  tout  ce  qui  nous  est  contraire.  On  voit  donc  comment  ce  brouillon  mesle  et  confond  tout,  se  iouant  de  la  parolle  de  Dieu  comme  d'une  pelote.  Il  fait  bien  semblant  qu'en  donnant  liberte  de  toutes  choses,  il  n'entend  point  permettre  qu'on  ravisse  les  biens  ou  femmes  d'autruy,  mais  seule-