48:590  Mais  quoy?  C'est  seulement  une  entree:  il  y  faut  marcher  plus  avant.  Ce  qu'il  fait  quand  il  nous  retire  de  ceste  captivite  malheureuse  de  peche,  et  que  nous  avons  la  liberte  qu'il  nous  a  promise.  Voyla  donc  comment-  ce  n'est  pas  tout  d'estre  entrez,  mais  il  faut  suyvre  plus  avant,  iusques  a  ce  que  nous  soyons  plenement  unis  a  Iesus  Christ.  Et  de  faict  nous  voyons  que,  combien  que  Dieu  nous  ait  illuminez  par  son  sainct  Esprit,  et  que  nous  desirions  de  cheminer  en  sa  crainte,  et  cognoistre  sa  bonte  pour  y  mettre  nostre  fiance,  toutes  fois  il  y  a  encores  tant  d'infirmitez  que  c'est  pitie,  et  nous  avons  a  batailler  contre  beaucoup  de  tentations,  et  sommes  souvent  vaincus.  Que  sera-ce  donc?  Est-ce  assez  d'estre  entrez?  Nenni,  nenni,  mais  il  faut  que  nous  cognoissions  que  nostre  vie  est  une  voye,  et  qu'il  faut  tousiours  marcher  iusques  a  ce  que  nous  soyons  venus  a  nostre  Seigneur  Iesus  Christ.  Ainsi  faut-il  que  le  Royaume  de  Dieu  croisse  de  plus  en  plus,  iusqu'a  ce  que  nous  soyons  despouillez  de  peche.  Car  nous  experimentons  assez  tous  les  iours  combien  il  s'en  faut  que  nous  soyons  unis  a  Dieu  comme  nous  devons.  C'est  donc  signe  que  Dieu  n'y  regne  pas  comme  il  doit:  car  s'il  y  regnoit,  il  n'y  auroit  nerf  ne  veine  qui  ne  tendissent  la.  Et  au  contraire  nons  sentons  tant  de  rebellions  quand  nous  voulons  faire  ce  que  Dieu  nous  enseigne.  Veu  donc  qu'il  y  a  encores  une  telle  resistance  en  nous  contre  Dieu  et  sa  iustice,  c'est  signe  qu'il  ne  domine  point  en  nous  paisiblement:  car  tout  ce  que  nous  avons,  voire  iusqu'au  bout  des  ongles  mesmes,  deveroit  tendre  la  que  la  gloire  de  Dieu  apparust  et  reluisist  par  tout.  Au  contraire,  depuis  le  sommet  de  la  teste  iusques  au  pied,  nous  voyons  toute  resistance  en  nous.  Voyla  comment  nous  pouvons  veoir  que  le  Royaume  de  Dieu  n'est  point  accompli.  Et  pourtant  nous  sommes  admonestez  de  marcher  avant  iusques  a  ce  que  Dieu  nous  soit  tout  en  toutes  choses:  c'est  ascavoir  qu'il  nous  emplisse  tellement  de  luy  que  nous  soyons  vuides  de  nous-mesmes:  mesment  que  nous  soyons  desvestus  de  ce  corps-ci,  et  que  nous  soyons  ressuscitez  en  ceste  gloire  qu'il  nous  a  promise.  Les  propos  donc  que  tenoit  Iesus  Christ  avec  ses  Apostres,  c'est  a  dire  du  Royaume  de  Dieu,  tendoyent  a  ce  que  nous  renoncions  a  nous  mesmes,  et  que  tout  ce  qui  est  du  nostre  soit  abbatu,  et  que  Iesus  Christ  y  dresse  son  throne,  qu'il  nous  conduise,  et  que  nous  soyons  du  tout  conformez  a  sa  iustice,  que  nous  ne  cherchions  qu'a  le  suyvre  comme  nostre  Roy  souverain.  Or  ie  di  que  tout  ceci  s'adresse  a  nous.  Pourquoy?  Car  les  Apostres  n'ont  pas  seulement  este  enseignez  pour  eux,  mais  pour  nous.  Notons  donc  que,  quand  on  nous  annonce  l'Evangile,  c'est  afin  que  nous  sortions  de  ce  monde:  c'est  ascavoir  de  toutes  les  meschantes  affec-