40:590  hoc  absurdum,  quod  una  tantum  imago  proponitur.  Sed  probabile  est,  imo  facile  potest  cognosci,  hic  Deum  non  respexisse  ad  consensum,  qui  nullus  fuit  inter  illas  quatuor  monarchias,  sed  ad  statum  totius  orbis.  Voluit  igitur  Deus  sub  hac  figura  pingere  quae  futura  esset  mundi  conditio  usque  ad  Christi  adventum.  Haec  ratio  est  cur  simul  coniunxerit  Deus  haec  quatuor  imperia,  quae  tamen  ita  inter  se  diversa  fuerunt,  ut  secundum  natum  sit  ex  interitu  primi,  tertium  ex  interitu  secundi.  Hoc  unum  est.  Iam  quaeri  etiam  potest  secundo  loco,  cur  regnum  babylonicum  tam  honorifice  nominet  Daniel  aureum.  Scimus  enim  illic  grassatam  fuisse  immanem  tyrannidem:  scimus  quales  fuerint  Assyrii.  Atqui  tunc  coniuncti  erant  Chaldaeis.  Nam  scimus  tandem  Ninevem  fuisse  dirutam,  et  Chaldaeos,  ut  certa  esset  imperii  sedes  apud  se,  Babylonem  fecisse  caput  regni.  Si  expendimus  quaenam  fuerint  principia  illius  monarchiae,  certe  reperiemus  et  Assyrios  fuisse  immanes  bestias,  plenos  avaritia,  et  crudelitate,  et  rapinis:  Chaldaeos  autem  his  omnibus  vitiis  fuisse  superiores.  Cur  ergo  vocatur  imperium  illud  caput?  Deinde,  cur  vocatur  caput  aureum?  Quod  ad  nomen  capitis  spectat,  quia  praecessit  monarchia  illa  tempore,  non  mirum  est  si  gradum  illi  supremum  assignet  Daniel.  Quod  autem  hic  praeterit  Ninevem,  non  mirum  est:  quia  iam  excisa  erat:  hic  autem  agitur  de  rebus  futuris.  Fuit  igitur  imperium  chaldaicum  primum  ordine  temporis,  quod  vocatur  aureum  comparative:  quia  ut  mundus  semper  in  deterius  labitur,  ita  factum  est  ut  Persae  et  Medi,  qui  occupaverant  totum  Orientem  Cyri  auspiciis,  essent  peiores  Assyriis  et  Chaldaeis.  Profani  etiam  poetae  fabulantur  de  quatuor  saeculis,  aureo,  argento,  aereo  et  ferreo.  Nulla  apud  eos  fit  mentio  testae:  sed  tamen  non  dubium  est,  eos  sumpsisse  ex  Daniele  quod  tradunt.  Si  quis  obiiciat,  Cyrum  excelluisse  summis  virtutibus,  et  fuisse  quasi  heroico  ingenio,  ut  prudentiam  eius  et  strenuitatem  et  alias  dotes  celebrant  historici:  respondeo,  hic  non  spectandam  esse  personam  unius  hominis,  sed  continuum  statum  imperii  persici.  Hoc  igitur  iam  satis  probabile  est,  dum  confertur  imperium  Medorum  et  Persarum  cum  imperio  babylonico,  vocari  argenteum,  quia  prolapsi  sunt  mores  in  deterius,  sicuti  dictum  est.  Et  experientia  etiam  demonstrat,  mundum  semper  decidere,  et  paulatim  inclinare  ad  vitia  et  corruptelas.  Quod  attinet  ad  imperium  macedonicum,  non  debet  absurdum  videri  quod  aeri  confertur:  scimus  enim  quam  truculentum  fuerit  ingenium  illud  Alexandri.  Quod  enim  facilitas  gratiam  apud  historicos  ei  conciliat,  frivolum  est:  quia  si  reputamus  qualis  fuerit  eius  natura,  certe  spiravit  a  prima  pueritia  crudelitatem.  Quid  hoc  fuit,  cernere  in  puero  invidiam  vel  aemulationem?  Quum  videret  patrem  vel  bello  domare,  vel