32:590  nous  soyons  assaillis,  que  c'est  alors  qu'il  est  besoin  de  recourir  a  Dieu,  que  c'est  alors  que  nous  luy  devons  demander  qu'il  nous  sauve,  et  qu'il  remedie  a  nos  fautes,  lesquelles  autrement  nous  meneroyent  a  perdition.  Voyla  un  item.  Or  nous  avons  puis  apres  a  noter,  que  nous  donnerons  bonne  approbation  de  vouloir  servir  a  Dieu,  en  resistant  aux  combats.  Si  les  meschans  taschent  a  nous  desbaucher,  et  que  nous  demeurions  fermes,  voyla  nostre  foy  et  constance  bien  approuvee.  Et  cecy  est  dit,  afin  que  nul  ne  se  flatte:  comme  nous  pensons  que  ceste  excuse  nous  doit  servir,  et  que  Dieu  aussi  s'en  doit  contenter,  quand  nous  alleguerons  que  nous  avons  este  desbauchez  par  le  moyen  d'autruy.  O!  voyla,  dira  chacun,  i'estoye  en  bon  train,  et  desiroye  de  vivre  selon  Dieu:  mais  quand  ie  voy  le  monde  si  pervers,  et  que  tous  sont  adonnez  a  tant  de  vices,  il  m'est  impossible  de  pouvoir  eschapper  que  ie  ne  face  comme  les  autres.  Quand  donc  nous  mettons  en  avant  telles  excuses,  il  nous  semble  que  Dieu  s'en  doit  bien  contenter.  Mais  au  contraire,  nous  voyons  yci  que  les  fideles  ne  laissent  pas  pourtant  de  servir  a  Dieu,  quand  tout  le  monde  les  voudroit  empescher  de  ce  faire:  que  si  les  meschans  leur  dressent  des  mensonges,  qu'ils  leur  mettent  des  empeschemens  qui  les  destournent  pour  les  faire  decliner  de  la  droite  voye,  que  toutes  fois  ils  demeurent  fermes  et  constans.  Et  voyla  aussi  comme  il  nous  en  faut  faire,  si  nous  voulons  servir  fidelement  a  nostre  Dieu:  nous  ne  devons  point  laisser  de  poursuyvre  nostre  vocation,  encores  que  ies  meschans  s'efforcent  tant  qu'il  leur  sera  possible  de  nous  divertir  du  chemin  de  salut*  Or  si  ceste  admonition  a  iamais  este  necessaire,  elle  l'est  auiourd'huy  plus  que  iamais.  Car  nous  voyons  que  le  monde  est  venu  iusqu'au  comble  de  toute  iniquite,  que  nous  ne  scaurions  point  marcher  un  pas  qu'il  n'y  ait  beaucoup  de  mauvaises  rencontres,  qui  nous  pourroyent  fascher,  et  nous  destourner  et  desbaucher  a  tous  propos.  D'autant  plus  donc  nous  faut-il  prattiquer  ceste  doctrine,  Que  les  meschans  ont  dresse  des  mensonges  contre  nous:  mais  cependant  que  nous  avons  garde  la  Loy  de  Dieu.  Or  les  mensonges  que  nous  dressent  les  orgueilleux  et  ennemis  de  Dieu,  ne  sont  point  d'une  seule  espece.  Car  quelques  fois  ils  nous  viendront  seduire  sous  couleur  d'amitie,  quelques  fois  ils  nous  viendront  mettre  en  avant  beaucoup  de  choses  pour  nous  faire  perdre  courage,  quelques  fois  ils  viendront  tellement  troubler  tout,  qu'on  ne  discernera  plus  entre  le  blanc  et  le  noir.  D'autant  plus  nous  faut-il  estre  advisez  et  sur  nos  gardes.  Et  combien  que  le  Diable  se  transfigure  ainsi  en  diverses  sortes,  que  nous  ne  laissions  point  de  garder  la  Loy  de  Dieu,  voire  et  de  tout  nostre  coeur:  ce  que  nous  devons  bien  noter.  Car  si  nous  avons  seulement