9:59  59  SECUNDA  DEFENSIO  60  tantum  abest,  ut  pravae  conspirationi  ad  nos  hostiliter  vexandos  nomen  suum  adscribant.  Imo  fieri  aliter  non  potest,  dum  nobis  opponit  quotquot  Augustanae  confessioni  subscribunt,  quin  brevi  deprehendant  lectores  ea  in  re  fucum  sibi  fieri.  Atque  ut  optimus  quisque  eius  confessionis  defensor  rogetur,  responsurum  non  dubito,  malis  auspiciis  turbari  pacem,  cuius  retinendae  studium  non  dissimulant,  qui  paulo  plus  autoritatis  in  Saxonia  merentur  quam  centum  Westphali.  Quibus  ad  scribendum  causis  adductus  fuerit  dum  recenset,  se  de  tuenda  bona  fama  valde  sollicitum  esse  ostendit,  ≪e  in  ministerium,  quo  fungitur,  [pag.  28]  contemptus  recidat,  fidesque  minuatur  suis  scriptis.  Si  tibi  est  cordi  bona  fama,  quis  te  ad  eam  prostituendam  pravus  genius  impulit,  quum  tibi  maneret  salva  et  integra  si  taceres?  Ipse  tibi  infamiam  contraxisti,  quam  eluere  non  ita  facile  erit.  Augebis  vero  quoad  ab  odiosa  ista  rixandi  libidine  desistas.  Iterum  repetam,  non  poteras  initio  tibi  melius  consulere,  ac  ne  hodie  quidem  potes,  quam  tacendo.  Quod  vero  non  parum  hic  te  metus  angit,  ne  fides  tuis  scriptis  depereat,  ex  tuo  unius  sensu  aestima  quantopere  excruciet  pios  omnes  longe  gravius  incommodum,  ubi  te  vident  ad  detrahendam  tot  magnorum  ac  praestantium  virorum  tam  utilibus  scriptis  fidem,  violento  conatu  incumbere.  Ne  sim  iam  unus  ex  eorum  numero,  quibus  fidem  detrahere  tentasti.  Sed  dum  tibi  propositum  esse  vident  omnes,  Oecolampadium,  Zvinglium,  Bucerum,  Petrum  Martyrem,  Bulingerum,  Ioannem  a  Lasco  labefactare,  ut  tota  eorum  existimatio  concidat,  quem  omnino  pium  et  aequum  hominem  in  mundo  esse  putas,  cuius  stomachum  in  te  non  provocet  tam  maligna  obtrectatio?  Quos  tibi  de  libris  tuis  gratificandi  causa  plausus  dent  [pag.  29]  gregales  tui,  nescio:  quid  tu  ipse  iudices,  videris.  Sed  iniuriam  tibi  fieri  non  dices,  si  eorum  quos  nominavi  unumquemque  tibi  praeferam.  Quanquam  si  te  ita  excaecat  stultus  tui  amor,  ut  honore  antecedere  cupias,  quos  doctrina  procul  sequeris,  nobis,  qui  tibi  nullo  iure  addicti  sumus,  maior  habenda  est  publici  boni  ratio.  Mentio  librorum,  quam  saepius  ingeris,  te  aliquid  scripturire  denunciat.  Sed  qualecunque  sit  illud,  minore  ecclesiae  iactura  perierit,  quam  unus  ex  multis  liber,  quos  omnes  abolere  tibi  fuit  in  animo:  quo  mihi  iustior,  te  quoque  autore,  defensio  suppetit,  qui  fidem  et  operam  meam,  ne  praeclaris  suis  opibus  ecclesiam  spoliares,  interposui.  Librum  deinde  suum  in  quatuor  capita  partitur.  Primo  enim  refutandum  suscipit  quod  scripsi,  perperam  ab  ipso  et  inscite  nos  fuisse  traductos,  quasi  pugnantia  scribamus.  Deinde  quod  dixeram  iniuste  nos  fuisse  ab  eo  reprehensos,  ac  si  nihil  praeter  vacua  symbola  in  coena  Domini  relinquamus.  Tertio  hoc  assumit,  se  discordias  non  excitare,