47:59  59  IN  EVANGELIUM  IOANNIS  60  videtur,  corpus  quod  nunc  putredini  obnoxium  est,  ubi  in  pulverem  et  nihilum  redactum  fuerit,  beata  immortalitate  indui,  socordiam  illis  exprobrat,  quod  in  grano  tritici  non  considerent  similem  Dei  potentiam.  Neque  enim  germinat  semen,  donec  putrefactum  fuerit.  Haec  illa  est  admirabilis  sapientia  de  qua  exclamat  David  (Ps.  104,  24).  Nimis  ergo  stupidi  sunt,  qui  communi  naturae  ordine  admoniti  non  altius  assurgunt,  ut  Dei  manum  in  spirituali  Christi  regno  longe  potentiorem  agnoscant.  Caeterum,  quod  mirari  vetat  Christus,  non  ita  accipere  convenit,  quasi  sordere  nobis  velit  tam  praeclarum  Dei  opus,  et  quod  praecipua  admiratione  dignum  est:  sed  admiratione  nos  teneri  non  vult,  quae  fidem  nostram  impediat.  Multi  enim  respuunt  quasi  fabulosum,  quod  nimis  arduum  ac  difficile  putant.  In  summa,  ne  dubitemus  spiritu  Dei  nos  refingi  ac  fieri  novos  homines,  quamvis  agendi  modus  nos  lateat.  8.  Spiritus  quo  vult  spirat.  Non  quod  proprie  voluntas  sit  in  flatu,  sed  quia  libera  sit  agitatio,  et  vaga  et  varia:  nunc  enim  aer  in  hanc,  nunc  in  illam  partem  fertur.  Hoc  autem  ad  rem  facit:  quia  si  instar  aquae  continuo  motu  flueret,  minus  esset  in  eo  miraculi.  Sic  est  omnis.  Significat  Christus  non  minus  perspici  in  hominis  renovatione  spiritus  Dei  motum  et  actionem,  quam  aeris  in  hac  terrestri  et  externa  vita:  sed  modum  esse  reconditum.  Nos  ergo  ingratos  esse  et  malignos,  si  incomprehensibilem  Dei  virtutem  in  coelesti  vita  non  adoramus,  cuius  tam  illustre  specimen  in  hoc  mundo  nobis  exhibet,  si  minus  in  restituenda  animae  salute  illi  tribuimus  quam  in  tuendo  corporis  statu  nobis  demonstrat.  Applicatio  paulo  erit  clarior,  si  sententiam  ita  resolvas:  Talis  est  vis  et  effectus  spiritus  sancti  in  homine  regenito.  9.  Quomodo  possunt  haec  fieri?  Videmus  quid  maxime  obstet  Nicodemo:  quidquid  audit,  portento  simile  existimat,  quia  modum  non  assequitur:  ita  nullum  nobis  peius  obstaculum  est  quam  propria  arrogantia,  quod  scilicet  sapere  semper  volumus  plus  quam  oportet,  ac  proinde  diabolico  fastu  reiicimus  quidquid  rationi  nostrae  non  est  expositum.  Quasi  verum  immensam  Dei  potentiam  ad  tam  angustum  modulum  restringi  aequum  sit.  Licet  quidem  de  modo  et  ratione  operum  Dei  aliquatenus  inquirere,  modo  sobrie  et  reverenter,  sed  Nicodemus  hac  obiectione  quasi  fabulam  repudiat,  quod  fieri  posse  non  credit.  Qua  de  re  plenius  tractabimus  cap.  6.  10.  Tu  es  magister  Israelis.  Quia  frustra  apud  hominem  superbum  tempus  et  operam  docendo  se  consumere  videt  Christus,  ad  obiurgationem  descendit.  Et  certe  apud  tales  nullus  unquam  doctrinae  profectus  erit,  donec  pravae  confidentiae  flatu