49:589  589  SUR  L'EPITRE  AUX  CORINTHIENS.  590  stance  du  signe  visible,  n'estoit  pas  encores?  Mais  ici  il  nous  faut  revenir  a  ce  que  l'Apostre  declare  en  l'Epistre  aux  Hebrieux,  que  Iesus  Christ  a  este  auiourd'huy,  et  fut  hier,  et  sera  iusques  a  la  fin.  Par  la  ii  nous  monstre  que  combien  que  nostre  Seigneur  Iesus  Christ  n'ait  point  vestu  chair  humaine,  iusques  a  ce  qu'il  ait  este  nay  de  la  vierge  Marie:  tant  y  a  qu'il  n'a  point  laisse  d'avoir  tousiours  sa  vertu  :  car  comme  il  est  dit  en  l'autre  lieu,  II  a  este  crucifie  en  Esprit.  ^Comment  cela?  Ii  semble  que  Iesus  Christ  n'ait  donc  este  crucifie  que  par  imagination.  Or  l'Apostre  ne  l'entend  pas  ainsi:  mais  il  monstre  qu'il  ne  nous  faut  point  considerer  en  la  mort  et  passion  de  nostre  Seigneur  Iesus  Christ,  seulement  ce  que  nous  pouvons  veoir  a,  l'oeil,  et  qui  nous  est  recite  par  l'histoire:  mais  qu'il  faut  que  nous  cognoissions  la  un  ordre  Divin,  et  que  Dieu  a  voulu  reconcilier  envers  sa  maieste  tout  le  monde  par  ce  moyen.  Et  de  faict,  tout  ce  que  nostre  Seigneur  Iesus  Christ  a  souffert,  ne  pourroit  de  rien  profiter,  sinon  que  nous  en  fussions  sanctifiez  par  l'Esprit  de  Dieu.  En  somme,  l'Agneau  par  lequel  les  pechez  du  monde  sont  effaces,  a  este  immole  en  son  temps:  mais  il  n'avait  pas  laisse  d'estre  desia  sacrifie  devant  Dieu  en  vertu  et  en  efficace  devant  la  creation  du  monde,  comme  il  est  dit  en  l'autre  lieu.  Maintenant  donc  nous  voyons  qu'il  n'y  a  nul  inconvenient  que  les  Peres  ayent  obtenu  pardon  de  leurs  offenses  devant  Dieu,  d'autant  que  le  sang  de  nostre  Seigneur  Iesus  Christ  devoit  estre  espandu  pour  leur  lavement  et  purgation.  Or  il  n'estoit  pas  encores.  Il  est  vray:  mais  cependant  la  vertu  du  sainct  Esprit  a  besongne  tellement,  que  le  sang  de  nostre  Seigneur  Iesus  Christ  a  tousiours  servi  de  cest  usage-la  envers  les  hommes.  Et  pourtant  sans  cela  tous  leurs  sacrifices  ^n'eussent  rien  valu,  c'eussent  este  choses  frivoles:  a  Circoncision  n'estoit  point  pour  sanctifier  le  peuple:  car  y  a-il  sainctete  qu'en  Iesus  Christ?  Il  est  certain  que  non:  car  ce  n'est  point  sans  cause  qu'il  est  dit  que  l'Esprit  de  Dieu  a  repose  sur  luy,  voire  l'Esprit  de  sainctete.  Puis  qu'ainsi  est  donc,  le  peuple  ancien  pouvoit  obtenir  ce  qui  luy  estoit  figure  par  la  Circoncision,  qu'en  la  vertu  et  grace  de  nostre  Seigneur  Iesus  Christ.  Tous  sont  maudits  en  Adam:  et  ce  peuple-la  estoit  une  semence  benite.  Et  pourquoy?  D'autant  que  Iesus  Christ  apporte  benediction.  En  somme  nous  voyons  maintenant  que  la  vertu  de  nostre  Seigneur  Iesus  Christ  n'a  point  commence  de  donner  salut  aux  hommes,  lorsqu'il  a  vestu  nostre  nature,  mais  que  de  tout  temps  elle  a  demeure:  voire  tellement  qu'a  bon  droict  nous  pouvons  dire  que  les  Peres  ont  este  baptizez  en  son  nom,  et  ont  obtenu  la  grace  laquelle  auiourd'huy  nous  est  communiquee.  Et  cela  doit  estre  aussi  bien  applicque  a  ce  que