40:589  589  IN  DANIELEM.  CAP.  II.  590  32.  Huius  imaginis  caput  ex  auro  bono  (aurum  bonum),  pectus  eius  et  brachia  eius  ex  argento,  venter  eius  et  femora  eius  ex  aere  (aes).  33.  Crura  eius  ex  ferro  (ferrum),  pedes  eius  partim  ex  ferro,  et  partim  testa.  34.  Videbas,  quousque  excisus  fuit  lapis,  qui  non  ex  manibus  (qui  non  excisus  fuit  manibus  hominum),  et  percussit  imaginem  ad  pedes,  qui  (erant)  ex  ferro  et  testa,  et  contrivit  eos,  35.  Tunc  contrita  sunt  simul  ferrum,  testa,  aes,  argentum,  et  aurum:  et  fuerunt  quasi  quisquiliae  (vel,  palea)  eue  area  aestivali:  et  abstulit  ea  ventus,  et  non  inventus  est  locus  eorum:  et  lapis  qui  percusserat  imaginem  fuit  in  montem  magnum,  et  implevit  totam  terram.  Quanquam  Daniel  hic  somnium  recitat,  necdum  attingit  interpretationem,  tamen  non  possumus  ulterius  progredi,  quin  disseramus  de  re  ipsa.  Postea  ubi  accedet  interpretatio,  confirmabimus  quae  iam  antedicta  fuerint,  et  expoliemus,  ut  contextus  feret.  Hic  Daniel  recitat  visam  fuisse  imaginem  a  rege  Nebuchadnezer,  quae  constabat  ex  auro,  argento,  aere,  et  ferro:  sed  in  pedibus  erat  aliquid  permixtum,  nempe  quod  partim  erant  ferrei  pedes,  partim  testacei.  De  nomine  visionis  iam  ante  dictum  est:  sed  breviter  iterum  repeto,  regem  Nebuchadnezer  non  vidisse  oculis  hanc  imaginem,  cuius  fit  mentio,  sed  fuisse  speciem  revelationis,  quam  certo  cognovit  divinitus  sibi  fuisse  oblatam.  Alioqui  poterat  omnem  curam  excutere,  et  libenter  fecisset,  sed  Deus  tenuit  illum  quasi  constrictum  in  tormentis,  donec  adesset  interpres  Daniel.  Vidit  ergo  Nebuchadnezer  imaginem.  Hoc  extra  controversiam  quicunque  praediti  sunt  sano  iudicio,  et  candide  etiam  cupiunt  mentem  prophetae  exponere,  intelligunt  de  quatuor  monarchiis,  in  quibus  alia  aliam  sequuta  est.  Iudaei  quia  premuntur  hoc  oraculo  confundunt  imperium  turcicum  una  cum  romano.  Sed  facile  coarguitur  eorum  et  inscitia  et  improbitas.  Nam  dum  volunt  effugere  ne  cogantur  fateri  Christum  mundo  fuisse  exhibitum,  quaerunt  putidas  calumnias,  quae  opus  refutatione  non  habent:  sed  tamen  aliquid  de  illis  postea  dicetur  suo  loco.  Interea  verum  est  quod  dixi,  nempe  interpretes  qui  et  mediocri  iudicio  pollent  et  candore  omnes  ad  unum  hunc  locum  exponere  de  monarchia  babylonica,  persica,  macedonica  et  romana.  Et  Daniel  ipse  postea  suis  verbis  hoc  satis  ostendit.  Quaeritur  tamen,  cur  Deus  has  quatuor  monarchias  figuraverit  sub  hac  imagine.  Videtur  enim  hoc  non  esse  consentaneum:  quia  nihil  Romanis  commune  fuit  cum  Assyriis.  Deinde  scitur  unde  factum  sit  ut  successerint  Medi  et  Persae  Chaldaeis,  quod  scilicet  hostiliter  expugnata  fuerit  Babylon,  et  Cyrus  adeptus  victoriam  transtulerit  imperium  ad  Persas  et  Medos.  Posset  igitur  videri