5:588  de  humaine  sagesse.  Les  nostres  aussi,  ont  bien  modere  plusieurs  controversies,  mais  ce  a  este  selon  la  reigle  de  la  parolle  de  Dieu,  et  des  tesmoignages  apostoliques.  Nous  estimons  donc  que  les  articles  presentez  par  les  trois  deputez  de  nostre  part,  sont  modestement  escriptz  et  vrais:  et  pourtant  nous  en  demeurons  la  et  prions  vostre  maieste,  Sire,  de  prendre  ceste  nostre  response  a  la  bonne  part.  Car  puis,  qu'il  est  icy  question  de  la  gloire  de  Dieu  et  de  la  clarte  de  l'Evangile,  nous  ne  devons  confermer  les  faceons  de  faire  vicieuses,  ne  les  opinions  qui  obscurcissent  l'Evangile.  Or  combien  gros  abuz  seroyent  establis,*  si  on  recevoit  l'opinion  du  Livre,  touchant  l'invocation  des  Sainctz  et  aultres  observations  dressees  sans  la  parolle  de  Dieu.  D'avantage,  puis  que  noz  consciences  et  celles  de  noz  eglises  sont  du  tout  persuadees  de  ces  matieres  selon  que  nous  en  parlons,  il  ne  nous  est  pas  licite  de  prononcer  contre  noz  consciences.  Pareillement  cela  emporteroit  preiudice  a  toute  l'Eglise.  Car  si  nous  approuvions  de  rechef  les  abuz  que  nous  avons  taxe  par  cy  devant,  on  s'ayderoit  de  nostre  tesmoignage  contre  tous  ceulx  qui  sentent  droictement  de  la  Religion,  voire  iusques  au  temps  advenir:  ainsi  les  erreurs  seroyent  establis  aux  aultres  pays,  et  la  cruaulte  iniuste  de  ceux  qui  maintiennent  les  abuz  seroit  corroborec.  Quel  lien  seroit  ce  mettre  sur  l'Eglise,  si  nous  confessions  qu'on  ne  scauroit  trouver  nulle  faulte  en  un  conseil  general?  Entre  les  Clementines  il  y  en  a  une  faicte  au  conseil  de  Vienne  en  daulphine,  ou  le  pape  afferme  que  la  seigneurie  de  l'Empire  Romain  est  sienne,  et  qu'elle  luy  a  este  donnee  de  Christ.  Chascun  peult  veoir  combien  ceste  sentence  est  absurde.  Et  d'autant  que  les  papes  et  evesques  se  sont  tousiours  plus  [fol.  92]  amusez  a  acquerir  royaumes  et  seigneuries  qu'ilz  n'ont  eu  soing  d'enseigner:  on  voit  combien  de  maulx  il  s'en  est  ensuivy.  On  pourroit  noter  beaucoup  d'autres  erreurs  des  Synodes  que  nous  obmettons.  Qui  plus  est,  en  noz  villes  et  pays,  et  mesmes  en  noz  Eglises  domesticques,  quelles  placis  recevroient  les  bonnes  consciences  qui  ont  la  crainte  de  Dieu,  et  ont  este  abreuvees  de  la  pure  doctrine?  combien  y  auroit  il  de  fideles,  qui  nous  obiecteroient  ceste  reproche  de  S.  Paul:  Pourquoy  nous  retirez  vous  de  la  grace  de  Christ  pour  nous  mener  a  un  aultre  genre  de  doctrine?  car  on  iugeroit  de  nous  comme  des  Galatiens,  que  nous  aurions  corrompu  la  purete  de  l'Evangile.  Ces  raisons  comme  elles  sont  grandes,  nous  esmeuvent  de  tenir  bon,  quant  aux  articles  que  noz  deputez  ont  presente  sur  ce  qu'ilz  reprouvoient  au  livre.  Et  nous  offrons  de  rendre  raison  de  nostre  sentence,  et  de  declarer  lesdictz  articles,  lesquelz  contiennent  choses  grandes  et  necessaires  a  l'Eglise.