49:588  nous  testifie  cela  par  signes  visibles,  selon  qu'il  cognoist  nous  estre  bon.  Car  (comme  i'ay  desia  dit)  ce  n'est  point  a  nous  d'en  donner  la  mesure:  mais  il  faut  que  Dieu  parle,  et  que  nous  escoutions  ce  qu'il  nous  dit,  nous  tenant  du  tout  a  sa  volonte.  Or  venons  maintenant  a  une  question  qu'on  pourroit  ici  faire.  S.  Paul  dit  que  les  enfans  d'Israel  ont  este  baptizez:  voire,  mais  en  Moyse.  Par  ci  devant  nous  avons  dit  que  nous  ne  sommes  point  baptizez  au  nom  dfun  homme  mortel:  car  Paul  n'a  pas  este  crucifie  pour  vous,  disoit-il  aux  Corinthiens:  monstrant  la  que  le  Baptesme  presuppose  que  celuy  au  nom  duquel  nous  le  recevons,  soit  nostre  Redempteur,  et  que  par  sa  grace  nous  soyons  reconciliez  a  Dieu  le  Pere.  Or  cela  n'appartient  qu'a  nostre  Seigneur  Iesus  Christ.  Quand  donc  le  Baptesme  seroit  donne  au  nom  d'un  homme  mortel,  il  n'y  auroit  que  pollution.  Toutesfois  maintenant  il  est  dit  que  le  peuple  a  este  baptise  en  Moyse.  Mais  par  ce  mot  il  ne  signifie  sinon  que  devant  que  l'Evangile  fust  publie,  le  peuple  n'a  point  laisse  d'avoir  un  Baptesme  sous  la  Loy.  Et  sainct  Paul  prend  ici  le  nom  de  Moyse,  pour  la  doctrine  qui  luy  a  este  commise  en  charge  :  comme  en  la  seconde  Epistre  il  dit  que  iusques  a  ce  que  Moyse  soit  converti  a  Iesus  Christ,  la  Loy  ne  sera  point  entendue  des  Iuifs.  Et  comment?  Moyse  en  sa  personne  faut-il  qu'il  soit  converti?  Nenni:  mais  cela  se  prend  pour  la  doctrine  de  Moyse:  comme  quand  il  est  dit,  la  Loy  et  les  Prophetes  iusques  a  Iean.  Voyla  les  Prophetes  qui  sont  conioints  a  la  Loy:  mais  c'est  a  dire  les  Propheties  desquelles  ils  ont  este  ministres:  et  puis  le  nom  de  Iean  n'est  pas  la  mis  pour  un  homme,  mais  c'est  pour  l'office  qui  luy  estoit  donne,  a  scavoir,  qu'il  faloit  qu'il  commencast  a  publier  l'Evangile,  attendant  que  Iesus  Christ  nous  apportast  une  declaration  plus  parfaite.  Les  Peres  donc  ont  este  baptizez  en  Moyse,  non  point  que  leur  Baptesme  fust  dedie  au  nom  de  cest  homme-la:  non  point  qu'il  fust  fonde  en  la  vertu  d'iceluy:  mais  il  y  a  eu  un  Baptesme  en  la  doctrine  qui  estoit  la  contenue  pour  les  Peres  anciens.  Or  cependant  on  pourroit  encores  demander  comme  sainct  Paul  accompare  ici  le  Baptesme  des  Iuifs  au  nostre:  veu  qu'il  n'y  peut  avoir  similitude,  ce  semble.  Car  le  Baptesme  ne  profitera  rien,  sinon  que  nous  ayons  recours  au  sang  de  nostre  Seigneur  Iesus  Christ,  lequel  est  nostre  purgation:  car  si  nous  n'en  sommes  lavez,  il  faut  que  Dieu  nous  tienne  comme  esclaves,  et  que  nous  soyons  comme  reiettez  de  luy.  Or  le  sang  de  Iesus  Christ  n'avoit  point  este  encores  espandu  pour  la  remission  des  pechez  :  et  mesme  le  Fils  de  Dieu  n'avoit  point  vestu  chair  humaine.  Comment  donc  est-il  possible  que  les  Peres  ayent  este  baptizez,  veu  que  la  sub-