40:588  spiritus  inter  se  differant,  quia  Daniel  fuit  quasi  duplex  homo,  ut  ita  loquar,  in  dotibus  quibus  Deus  voluerat  ipsum  ornare,  Nam  quod  ita  dextre  profecit  in  omnibus  scientiis,  quod  viguit  tanta  promptitudine  ingenii,  certe  iam  ante  ostendimus  hoc  totum  fuisse  ex  mera  Dei  liberalitate.  Caeterum  ea  quoque  tamen  hic  quasi  in  ordinem  cogit:  et  praedicat  singularem  hanc  Dei  gratiam  in  expositione  somnii.  Non  igitur  arcanum  hoc  mihi  patefactum  fuit  propter  sapientiam  quae  in  me  sit  prae  cunctis  mortalibus.  Non  affirmat  Daniel  se  superare  cunctos  mortales  sapientia,  quemadmodum  quidam  falso  haec  verba  torquent,  sed  relinquit  hoc  in  medio:  quasi  diceret,  hoc  adscribi  non  debet  sapientiae.  Nam  si  acutissimus  essem  omnium  mortalium,  tota  mea  perspicacia  nihili  foret.  Rursus  etiam  si  rudissimus  esseni  idiota,  Deus  tamen  voluit  me  praeficere  ministrum  tibi  ad  somnii  interpretationem.  Non  est  igitur  quod  quidquam  humanum  a  me  exspectes:  sed  perinde  ac  si  delapsus  essem  e  coelo,  ita  accipias  quod  dicturus  sum,  quoniam  sum  organum  spiritus  Dei.  Hic  simplex  est  verborum  sensus.  Sed  hinc  etiam  discamus  asserere  Deo  laudem  quae  soli  ipsi  debetur:  nempe  quod  eius  proprium  sit  munus  illuminare  mentes  nostras,  ut  comprehendamus  mysteria  coelorum.  Nam  etsi  naturaliter  simus  praediti  summo  acumine,  quamvis  hoc  sit  eius  donum,  tamen  est  donum  limitatum  (ut  ita  loquar)  quod  non  conscendit  usque  ad  coelos.  Discamus  ergo  Deo  relinquere  quod  suum  est,  quemadmodum  monemur  hac  Danielis  sententia.  Postea  adiungit,  sed  ut  manifestarem  regi  interpretationem,  et  cognosceres  cogitationes  cordis  tui.  Plurali  numero  utitur  Daniel,  sed  indefinite:  quasi  diceret,  Deus  quidem  reliquit  te  hactenus  suspensum,  sed  tamen  non  frustra  somnium  hoc  tibi  inspiravit.  Haec  igitur  inter  se  coniuncta  sunt,  quod  Deus  tibi  patefecit  arcanum  hoc,  deinde  quod  nunc  me  substituit  eius  interpretem.  Videmus  quorsum  tendat  Daniel.  Nam  poterat  hic  obstrepere  Nebuchadnezer:  Cur  Deus  me  ita  cruciat?  quorsum  attinet  me  hic  haerere  perplexum,  quia  somniaverim,  et  interea  somnium  mihi  exciderit,  et  eius  interpretatio  mihi  sit  incognita?  Quoniam  ergo  poterat  Nebuchadnezer  ita  litigare  cum  Deo,  Daniel  hic  anticipat,  et  ostendit  somnium  non  frustra  fuisse  oblatum,  aut  visionem  illam  :  sed  Deum  nunc  praestare  quod  adhuc  deerat,  nempe  ut  redeat  Nebuchadnezer  in  memoriam  sui  somnii,  et  simul  etiam  cognoscat  quisnam  esset  finis,  et  quaenam  esset  ratio  somnii  illius.  31.  Tu  rex  videbas,  et  ecce  imago  una  grandis,  imago  illa  magna,  et  splendor  eius  (vel,  apparentia,  ut  vulgo  loquuntur:  splendor  ergo  eius)  pretiosus  (vel,  excellens)  stabat  coram  te,  et  species  eius  terribilis.