35:587  587-588  NOTICE  PRELIMINAIRE.  se  rapportent  au  fameux  texte  d'Esaie  52,  13.53,  12.  Ils  portent  tous,  l'un  comme  l'autre,  le  titre  complet  que  voici:  Premier  (second  etc.)  sermon  de  la  prophetie  de  Christ,  touchant  sa  mort  et  passion:  prins  d'Isaie.  Voici  maintenant  la  preface  tres-interessante  de  Badius:  AUX  FIDELES  ESPARS  EN  PLUSIEURS  CONTREES,  CONRAD  BADIUS  DESIRE  GRACE  ET  BENEDICTION  PAR  IESUS  CHRIST  NOSTRE  SAUVEUR.  Nous  scavons  quel  a  este  l'orgueil  de  la  secte  des  Pharisiens,  lesquels  ia  soit  qu'ils  fussent  remplis  de  tenebres  et  d'ignorance  se  vantoyent  toutesfois  d'estre  grans  expositeurs  de  la  Loy,  iusques  a  prendre  leur  nom  de  la,  comme  s'ils  eussent  eu  en  leur  sein  la  mouelle  et  le  sens  secret  de  l'Escriture.  Cependant  au  lieu  de  repaistre  le  simple  peuple  de  vraye  et  saine  doctrine,  l'instruisoyent  a  ie  ne  scay  quels  badinages  et  vaines  ceremonies  qu'ils  invertoyent  outre  la  parolle  de  Dieu.  Autant  en  font  de  nostre  temps  nos  grans  docteurs  Sorbonistes,  et  tous  ces  criars  de  Moines,  desquels  les  uns,  combien  qu'ils  s'estiment  estre  les  piliers  de  l'Eglise,  compaignons  des  Apostres,  et  la  boutique  du  S.  Esprit,  ou  il  faut  prendre  toute  interpretation  des  Escritures,  et  resolutions  de  tous  les  points  de  la  religion,  neantmoins  ne  font  que  conter  des  fables  vaines  et  sottes,  ou  s'amusent  a  des  questions  curieuses  et  plenes  de  sophisterie,  et  a  mille  subtilitez  qui  ne  servent  d'aucune  edification.  Les  autres  preschent,  au  lieu  de  la  parolle  de  Dieu,  les  constitutions  et  ordonnances  qu'eux  mesmes  ont  faites  pour  establir  la  tyrannie  du  Pape,  vray  Antechrist  et  ennemi  de  la  verite:  les  autres  aussi  escument  en  chaire,  et  desgorgent  propos  arrogans  contre  les  enfans  de  Dieu,  et  ceux  ausquels  Iesus  Christ  s'est  revele  en  ces  derniers  temps,  les  appelans  Lutheriens,  seditieux,  et  controuvans  mille  mensonges  a  l'encontre  d'eux,  au  lieu  de  nourrir  de  vraye  pasture  de  la  parolle  de  Dieu  leurs  povres  brebis  affamees,  qui  hument  telles  poisons  en  guise  de  la  nourriture  spirituelle  de  leurs  ames.  Parquoy  mes  freres  et  bien-aimez  en  Iesus  Christ,  quand  Dieu  nous  envoye  quelque  bon  et  fidele  docteur,  qui  expose  purement  a  ses  auditeurs  la  parolle  de  Dieu,  nous  en  devons  tenir  un  merveilleux  conte:  car  il  s'en  trouve  bien  peu  qui  s'acquittent  fidelement  de  leur  charge:  et  entre  autres  nous  devons  avoir  en  singuliere  recommandation  ceux  que  Dieu  a  douez  de  graces  speciales  et  don  d'interpretation  :  comme  auiourd'huy  nostre  fidele  Pasteur  et  bon  serviteur  de  Dieu,  Iehan  Calvin  fait  grandement  profiter  le  talent  precieux  qu'il  a  receu  du  Seigneur,  selon  que  ses  predications  en  rendent  bon  tesmoignage,  lesquelles  (ainsi  que  toutes  personnes  equitables  en  peuvent  iuger)  ne  sont  point  faites  par  acquit,  ni  a  la  douzaine,  ains  sont  deuement  premeditees  et  bien  rapportees  a  la  capacite  de  ses  brebis,  ayant  tousiours  devant  les  yeux  le  benefice  du  Seigneur  Iesus  pour  l'engraver  vivement  en  leurs  coeurs.  Ce  ne  sont  point  lieux  communs  tout  maschez,  ne  sermons  qu'il  ait  en  sa  manche  pour  les  faire  servir  a  tous  passages  de  l'Escriture,  comme  une  forme  a��  tous  pieds:  ains  expositions  vrayes,  pures,  nues,  et  propres  pour  le  texte  qu'il  ha  a  deduire:  il  ne  les  farcit  point  d'exhortations  hors  propos:  il  ne  les  remplit  point  d'invectives  procedantes  d'ambition.  Car  encores  que  nous  ayons  grand  besoin  que  les  superstitions  de  la  Papaute  soyent  iournellement  impugnees  par  la  parolle  de  Dieu  pour  les  effacer  de  nos  coeurs,  comme  une  odeur  forte  de  laquelle  nous  avons  este  abbreuvez  des  nostre  enfance,  si  est-ce  que  si  le  passage  n'est  formellement  contre  tels  abus,  qu'il  ne  sortira  pas  de  son  interpretation  pour  crier  apres:  comme  les  Papistes  a  tous  coups  et  sans  propos  abbayent  comme  chiens  mastins  contre  l'Evangile  renouvele  ces  derniers  iours  au  monde:  mais  sa  coustume  est  de  suyvre  un  fil  et  une  teneur  qui  tend  a  edification,  n'omettant  rien  de  tout  ce  qui  fait  a  l'honneur  de  Dieu  et  instruction  de  ses  auditeurs.