5:586  vaises  opinions  peuvent  facilement  avoir  lieu,  veu  aussi  que  les  cueurs  des  hommes  declinent  tousiours  en  pis,  l'authorite  de  coustume  doit  bien  estre  soubzmise  en  l'Eglise  a  la  parolle  de  Dieu,  laquelle  parolle  est  comme  une  estincelle  luisante  en  ces  tenebres  humaines,  afin  que  nous  ne  soyons  par  faulses  persuasions  et  coustumes  vicieuses  destournez  de  Dieu:  mais  nous  scavons  que  c'est  chose  difficile  de  corriger  la  coustume,  encores  quelque  mauvaise  qu'elle  soit.  Or  puis  que  vostre  maieste  nous  a  commande  de  dire  nostre  advis  et  opinion  touchant  le  livre:  premierement,  nous  appellons  Dieu  en  tesmoing,  que  nous  aussi  desirons  la  concorde  de  tout  nostre  cueur,  moyennant  qu'elle  se  face  en  sorte  que  la  clarte  et  verite  de  l'Evangile  demeure  en  son  entier,  et  ne  doubtons  pas,  que  vostre  maieste,  [fol.  89]  selon  sa  piete  et  vertu  excellente  ne  veuille  qu'on  ayt  premierement  esgard  a  la  verite  :  laquelle  doit  clairement  reluyre  en  l'Eglise.  Nous  entendons  que  des  articles  du  Livre,  les  uns  ont  este  accordez  par  les  deputez,  les  aultres  non.  Nous  avons  diligemment  poise  ceux  qu'ilz  avoyent  communement  passe:  comme  de  la  volunte  humaine,  du  peche  originel,  de  la  iustification:  et  quelques  aultres.  Or  combien  que  quelques  poinctz  ayent  mestier  de  plus  longue  explication,  comme  il  sera  notte  puis  apres:  toutesfoys,  quand  on  vouldra  prendre  a  la  bonne  part  les  choses  qui  y  sont  dictes,  et  en  iuger  amyablement,  exposant  le  tout  sainement:  nous  ne  reprenons  pas  le  iugement  des  deputez.  Nous  desirerions,  que  la  doctrine  de  la  grace  de  Christ  et  de  la  iustice  de  foy,  fust  purement  publiee  par  les  Eglises.  Veu  donc,  que  icelle  est  brievement  comprinse  au  Livre,  si  on  tache  d'avancer  le  salut  des  ames,  et  establir  bonne  concorde,  il  fauldra  adiouster  une  exposition,  de  peur  que  la  briefvete,  ou  obscurete,  n'engendre  nouveaux  combatz.  Car  nous  prenons  les  articles  qui  sont  la  en  mesme  sens,  auquel  les  mesmes  choses  sont  traictees  en  nostre  confession  et  apologie.  De  nostre  part,  nous  ne  voulons  rien  envelopper,  d'autant  qu'il  n'est  pas  ne  iuste,  ne  utile  a  l'Eglise,  de  mettre  en  avant  articles  obscurs  ou  doubteux:  lesquelz  on  puisse  tirer  a  divers  sens  selon  le  plaisir  d'un  chascun.  Parquoy,  entant  que  nous  avons  peu,  nous  avons  mis  peine,  que  nostre  sentence  fust  deuement  et  clairement  exposee:  laquelle  nous  ne  doubtons  pas  estre  vrayement  le  consentement  de  l'Eglise  Catholicque.