49:586  du  tout  stupides.  Voyla  pourquoy  des  le  commencement,  Dieu  a  voulu  adiouster  des  sacremens,  qui  fussent  comme  gages,  afin  de  mieux  certifier  les  hommes  de  ce  qui  communement  ne  leur  seroit  point  assez  cognu.  Et  nous  voyons  que  mesmes  devant  le  peche  cela  a  este  fait.  Adam  n'estoit  pas  ainsi  corrompu  comme  nous  sommes,  il  avoit  une  nature  entiere:  Dieu  l'avoit  forme  a  son  image,  laquelle  auiourd'huy  est  effacee  en  nous:  et  toutesfois  encores  ha-il  un  sacrement  en  l'arbre  de  vie,  a  ce  qu'il  soit  tant  mieux-arreste  a  se  fier  en  Dieu,  a  chercher  la  tout  son  bien,  et  a  ne  point  decliner  en  facon  que  ce  soit.  Puis  qu'Adam  en  son  integrite  a  eu  besoin  de  ce  moyen-la,  que  sera-ce  auiourd'huy  de  nous  qui  sommes  tant  debiles,  et  non  seulement  chancelons,  et  sommes  facilement  esbranlez,  mais  sommes  du  tout  enclins  a  desfiance?  Car  si  Dieu  nous  attire  a  soy,  nous  reculons  et  allons  tout  au  rebours  comme  par  despit.  Puis  qu'ainsi  est  donc,  il  est  impossible  que  les  hommes  se  passent  des  Sacremens  et  signes  visibles.  Il  est  vray  que  les  Peres  en  ont  eu  plus  que  nous  :  voire  d'autant  que  la  verite  ne  leur  estoit  pas  revelee,  c'est  a  scavoir  nostre  Seigneur  Iesus  Christ.  Auiourd'huy  nous  avons  le  Baptesme  et  la  saincte  Cene:  eux  ont  eu  la  Circoncision  et  l'Agneau  Paschal:  ils  ont  eu  les  lavemens  tous  les  iours,  et  quasi  a  chacune  heure:  ils  ont  eu  les  sacrifices,  voire  en  tant  de  sortes  et  d'especes:  ils  ont  eu  toutes  les  figures  qui  sont  contenues  en  la  Loy:  ils  ont  eu  pour  un  temps  la  Manne,  le  serpent  d'airain,  ils  ont  eu  la  nuee  dont  parle  ici  sainct  Paul:  ils  ont  eu  les  iours  solennels,  ils  ont  eu  le  sanctuaire,  ils  ont  eu  l'arche  de  l'alliance  qui  estoit  nommee  la  face  de  Dieu:  ils  ont  eu  les  luminaires,  ils  ont  eu  ce  qui  appartenoit  a  la  dignite  sacerdotale,  qui  estoit  comme  une  figure  et  image  de  nostre  Seigneur  lesns  Christ.  Mais  combien  qu'auiourd'huy  nous  n'ayons  pas  une  telle  quantite  et  multitude  de  Sacremens,  ne  pensons  pas  que  nostre  condition  soit  pire  cependant.  Car  pour  ce  que  nous  avons  la  substance  en  Iesus  Christ,  il  n'est  ia  besoin  que  nous  ayons  un  tel  amas  de  figures:  car  cela  seroit  superflu,  et  mesme  ne  feroit  qu'obscurcir  la  clarte  de  l'Evangile.  Mais  quoy  qu'il  en  soit,  si  faut-il  a  cause  de  nostre  infirmite,  que  nous  soyons  attirez  a  Dieu  par  ces  moyens  terrestres,  lesquels  il  cognoist  estre  convenables  a  nostre  nature.  Or  de  la  nous  devons  recueillir  quel  est  l'usage  des  Sacremens:  c'est  ascavoir  de  nous  amener  a  Dieu,  et  non  point  nous  tenir  en  ce  monde:  car  ceux  qui  ne  regardent  point  plus  loin  que  les  signes  visibles,  en  font  des  idoles,  en  abusent  faussement,  et  les  pervertissent.  Comme  nous  voyons  les  Papistes,  quand  on  leur  parle  du  Baptesme,  que  scaventils  quelle  en  est  la  signification  et  l'usage?  Il  n'est  40