5:584  a  este  dict,  que  les  deputez  de  la  part  des  protestans  declaireroyent  par  escript  leur  opinion.  Toutes  ces  choses  ont  este  faictes  par  les  deux  parties,  selon  qu'il  leur  avoit  este  enioinct  par  l'Empereur,  et  ont  presente  a  sa  maieste  ce  qu'ilz  avoyent  faict:  et  ont  aussi  dict,  que  ia  soit,  qu'ilz  n'eussent  peu  convenir  du  tout,  neantmoins,  qu'ilz  esperoyent  que  Dieu,  par  sa  grace,  feroit  quelque  bonne  ouverture,  pour  parvenir  a  pleine  concorde.  Or  comme  la  volunte  et  intention  de  l'Empereur  a  tousiours  este,  que  cest  affaire  fust  vuide,  principalement  a,  l'honneur  de  Dieu  et  a  la  tranquillite  et  unite  de  l'Eglise  chrestienne,  et  par  especial  du  sainct  Empire,  encor  est  elle  a  present  Pourtant  affin  que  ceste  dissension  pernitieuse  soit  ostee,  et  que  le  dangier,  qui  en  pourroit  advenir  soit  evite:  il  prie  affectueusement  et  exhorte  les  electeurs,  Princes  et  tous  les  estatz,  tous  ensemble  et  chacun  en  son  endroict,  qu'ilz  veuillent  mettre  telle  peine  et  diligence,  que  a  faict  sa  maieste,  [fol.  87]  pour  venir  a  quelque  bonne  fin,  de  lire  diligemment  le  Livre  avec  les  articles  des  protestans,  pour  en  dire  leur  sentence  le  plustost  qu'il  sera  possible.  Et  non  seulement  de  deliberer  des  articles  accordez,  mais  aussi  consulter  ensemble  des  aultres,  qui  sont  en  different,  selon  que  le  temps  le  portera,  et  qu'il  leur  semblera  advis  expedient.  Pareillement  d'aviser  comment  et  par  quelz  moyens  on  pourra  corriger  les  abuz,  qui  sont,  tant  en  l'estat  ecclesiastique,  comme  seculier:  faire  une  bonne  reformation  et  chrestienne,  comme  la  necessite  nous  y  contrainct  merveilleusement.  L'Empereur  donc,  nostre  souverain  seigneur,  prie  et  admoneste  les  electeurs,  Princes  et  aultres  estatz,  de  vouloir  incontinent  prendre  cecy  en  main,  pour  luy  en  faire  scavoir  leur  advis:  enquoy  il  espere,  qu'ilz  feront  tous  leur  devoir.  Quant  a  sa  part,  il  s'offre,  comme  il  a  faict  par  cy  devant,  de  tenir  la  main,  a  ce  que  les  choses  soyent  amenees  a  bonne  fin  et  salutaire:  esperant  que  le  Legat  de  son  coste  fera  tout  ce  qui  sera  expedient  en  cest  endroit:  sur  tout  il  desire  qu'on  y  procede  en  diligence.